Almatyda ótken jyly 36 myńnan astam jasyl jelek otyrǵyzyldy - A. Rahymbetov
ALMATY. 11 sáýir. QazAqparat - 2011 jyly jalpy qalalyq aýmaqtarda 36 myńnan astam jasyl jelek otyrǵyzyldy, sonyń ishinde, bıýdjet qarajaty esebinen 27 571 aǵash pen butalar egildi jáne 9 myńnan astam ótemdik aǵashtar otyrǵyzyldy.
Bul týraly búgin Almatyda ótken 2011 jylǵy atqarylǵan jumystar boıynsha eseptik jıynda Almaty qalasy Tabıǵı resýrstar jáne tabıǵatty paıdalanýdy retteý basqarmasynyń bastyǵy Altaı Rahymbetov málim etti.
Onyń aıtýynsha, 11 aıdyń ishinde qala boıynsha apatty jaǵdaıdaǵy 10 787 aǵash kesilgen, 45 716 aǵashqa ósýin qalyptastyrý jáne sanıtarlyq qyrqý jumystary júrgizilgen.
"Basqarmanyń qalanyń jasyl qoryn jasartý jónindegi tujyrymdamasyna sáıkes qalanyń úlken kóshelerindegi qartaıǵan, apatty jaǵdaıdaǵy aǵyshtardy kesý jáne jas aǵash egý boıynsha jumystar júrgizilýde. Fýrmanov kóshesi, Dostyq jáne Seıfýlın dańǵyldaryn, Saın, Jeltoqsan kóshelerin jáne t.b. kóshelerdi kógaldandyrý boıynsha jumystar júrgizildi. Qalanyń barlyq aýdandarynda jalpy aýmaǵy 180 myń sharshy metr jerde ár túrli gúlder otyrǵyzylyp, gúlzarlar jasaldy; onyń ishinde jergilikti bıýdjet qarajatyna 87014,5 sharshy metr jerge gúlzar jasaldy. Almaty qalasy boıynsha ásemdik - gúldi kógaldandyrý nysandaryn qurý jáne maýsym boıy olardy kútip-baptaý boıynsha is-sharalar júrgizildi, 16 myńnan astam tik gúldi kógaldandyrýdyń elementteri ornatyldy. Kógaldandyrý aıasynda Alataý aýdanynda Boraldaı ózeni boıynda jasyl aımaq quryldy, «Halyq» sport-saýyqtyrý kesheni kógaldandyryldy, «Medeý» MÓTP aýmaǵynda 4900 aǵash otyrǵyzyldy", - dedi Altaı Rahymbetov.
Ol sonymen qatar: "2011 jyly Jetisý aýdanyndaǵy 2 baqty jańǵyrtý boıynsha jumystar jasaldy. Naqtyraq aıtqanda, birinshi Ratýshnyı kóshesiniń boıyndaǵy 2,4014 ga aýmaqtaǵy baqqa uzyndyǵy 429 q.m. qorshaý jasaldy, jaryq beretin 30 dana baǵana, 1 sport jáne 3 balalar alańy jasaldy, uzyndyǵy 2740 q.m. sýarý qubyry júrgizildi, sondaı-aq, aýmaǵy 17000 m2 asfalt tóseldi, kókjelekter men gúlzarlar otyrǵyzyldy, sáki men qoqys saýyttary ornatyldy, apatty jaǵdaıdaǵy jáne qýraǵan aǵashtar kesilip, jańadan kóshetter otyrǵyzyldy. Al, ekinshi, Jangeldın kóshesiniń boıyndaǵy 3,6 ga bolatyn baqqa uzyndyǵy 3510 q.m. qorshaý jasaldy, jaryq beretin 32 dana baǵana ornatyldy, 3 sport jáne 5 balalar alańy jasaldy, uzyndyǵy 5600 q.m. sýarý qubyry júrgizildi, aýmaǵy 7255 m2 asfalt tóseldi, sonymen qatar, 25663 m2 aýmaq kógaldandyrylyp, sáki men qoqys saýyttary ornatyldy", -dedi.
