Almatyda ótken «Abaı oqýlarynyń» júldegerine dombyra tartý etildi
ALMATY. QazAqparat - Búgin Qazaq memlekettik qyzdar pedagogıkalyq ýnıversıtetinde el Táýelsizdiginiń 25 jyldyq mereıtoıyna oraı Almaty qalasy JOO stýdentteri arasynda «Abaıdy bilmek kerek, oıly jasqa» atty qalalyq Abaı oqýlary ótti, dep habarlaıdy «QazAqparat» tilshisi.
Baıqaýǵa Almaty qalasyndaǵy 6 joǵarǵy oqý ornynan 30-dan astam stýdent ishinen iriktelinip alynǵan 16 úmitker qatysty.
Baıqaýdyń shymyldyǵyn Qazaq fılologııasy jáne álem tilderi fakýlteti, Qazaq ádebıeti kafedrasynyń meńgerýshisi, f.ǵ.d. Sáýle Erjanova ashyp, oqý orynnyń Abaıtaný salasynda atqarylyp jatqan is-sharalarǵa toqtalyp ótip, barsha úmitkerlerge sáttilik tiledi.
«Eki atalym boıynsha ótken baıqaý bıyl da tartysty ótti. Birinshi bólimde qatysýshylar aqynnyń lırıkalyq nemese azamattyq taqyryptaǵy bir óleńi men bir qarasózin tereńnen túsine otyryp, mánerlep jatqa oqý, poezııany túsiný men jetkize bilý qabiletinen synǵa tússe, ekinshi bólimde Abaı ánderin óz naqyshyna keltirip, mýzykalyq aspapta úılesimdi súıemelmen, óz daýsymen oryndaý arqyly synǵa tústi. Baǵalaý kezinde olardyń Abaı óleńderi men qara sózderin túsinip oqý sheberligine, qazaq tiliniń orfoepııalyq normalaryn saqtap sóıleýine, án oryndaý naqyshyna jáne kıim úlgilerine nazar aýdaryldy», - dedi qazaq ádebıeti kafedrasynyń meńgerýshisi, f.ǵ.d. Sáýle Erjanova.
Baıqaý qorytyndysy boıynsha bas júldeni Abaı atyndaǵy Ulttyq ýnıversıtetiniń stýdenti Suńǵat Amanbaev qanjyǵasyna baılap, bas júldege tigilgen dombyrany jeńip aldy. І oryndy Qazaq memlekettik qyzdar pedagogıkalyq ýnıversıtetiniń stýdenti Qamajaı Erkebaeva ıelense, ІІ oryndy T.Júrgenov atyndaǵy Óner akademııasynyń stýdenti Qaldykóz Raqymjan men Qyzdar ýnıversıtetiniń stýdenti Gúlnaz Núsiphan ózara bólisti. Al, ІІІ oryndy Ál-Farabı atyndaǵy QazUÝ-dyń stýdenti Janar Ámirbek, Qaınar ýnıversıtetiniń stýdenti Jandarbek Zavkan, «Arystan» mamandandyrylǵan lıtseıiniń kýrsanty Rashıd Baratov ıelendi.
Top jarǵan jeńimpazdar dıplomdarmen jáne arnaıy syılyqtarmen marapattaldy.
