Almatyda ótip jatqan ál-Farabı olımpıadasyna 16 myńnan asa talapker qatysýda
ALMATY. 8 aqpan. QazAqparat /Názıra Eleýhan/ - Almatydaǵy ál-Farabı atyndaǵy Qazaq ulttyq ýnıversıtetinde «ál-Farabı olımpıadasynyń» І týry ótip jatyr.
Esterińizge sala ketsek, olımpıada aqpannyń 6-y kúni bastaldy. Daryndylardy aıqyndaý jáne olarǵa qoldaý kórsetý, mektep oqýshylarynyń shyǵarmashylyq qabiletterin damytý maqsatynda ótkiziletin jyl saıynǵy bilim báıgesine bıyl 16 000-nan asa talapker tirkelip, qatysýda. Bul ótken jylmen salystyrǵanda tórt myńǵa kóp. Talap boıynsha olar óz bilimderin ǵalamtor arqyly qashyqtyqtan onlaın synaq túrinde tapsyrýda. Al ǵalamtorǵa qoljetimsizder úshin QazUÝ-niń jastar ınternet ortalyǵy jeńildik jasady. Almaty qalasy men oblystan kelgen oqýshylar synaqty sol ortalyqta tapsyrýda. І týrda olımpıada qatysýshylary ár pánnen 30 suraq boıynsha test tapsyrady. Onyń qorytyndylary boıynsha jeńimpaz atanǵan talapkerler ІІ týrǵa joldama alady.
Ekinshi týr aqpannyń 21-23 aralyǵynda ótedi dep josparlanýda. Onyń jeńimpazdary QazUÝ-diń grant ıegeri atanatyn bolady. Dástúrli olımpıada talapkerler úshin bilimderin synaýǵa, eń bastysy elimizdiń eń bedeldi ýnıversıteti QazUÝ-diń stýdenti atanýǵa bir taban jaqyndaýǵa múmkindik berip keledi.
