Almatyda ótetin «Star of Asia» mýzykalyq shoýy 118 elde kórsetiledi
ALMATY. QazAqparat - Almatyda 19 jáne 20 tamyz kúnderi «Medeý» muz aıdynynda ótetin «Star of Asia» halyqaralyq festıvali 118 elde tikeleı efırden kórsetiledi, dep habarlaıdy QazAqparat tilshisi.
Uıymdastyrýshylardyń habarlaýynsha, mýzykalyq shoýdy tikeleı efırden jer sharynyń 118 eli kóretin bolady. Mádenı sharany AQSh, Kanada, Frantsııa, Germanııa, Koreıa, Japonııa, Reseı, Qytaı jáne basqa da elderdiń telearnalary taratýdy josparlaýda. Bulardan ózge, «Star of Asia» festıvalin túsirý úshin Almatyǵa arnaıy kelgen «Euronews» telearnasy da kórsetedi.
«Mýzyka festıvali kópshilikti qyzyqtyryp otyr, mysaly, shoýǵa qatysatyn artıstermen birge óte tanymal sheteldik jýrnalıster men blogerler de keletin boldy.Olar Almaty jáne festıval týraly jazady. Osylaısha, álemniń ár túkpirinde turatyn adamdar qalamyz týraly málimet alady. Bul, qalaǵa keletin týrıster sanyn arttyryp, ekonomıkaǵa oń yqpal etpek», - dedi sharany uıymdastyrýshylar.
Almatyda mundaı formattaǵy mýzykalyq festıval alǵash ret ótedi ári ol «Azııa daýysy» konkýrsy dástúriniń sımvolıkalyq jalǵasyna aınalady. Mádenı shara QR Prezıdentiniń «Rýhanı jańǵyrý» baǵdarlamasy aıasynda uıymdastyrylǵan jáne Qala kúnine arnalaǵan qomaqty sharalardyń bastaýy.
«Medeý» muz aıdynyna Qytaıdyń, Túrkııanyń, Japonııanyń, Ońtústik Koreıanyń, Indııanyń jáne basqa da shet memleketterdiń tanymal ánshileri keledi. Oldardyń arasynda ońtústik koreıalyq «U-KISS» K-ror toby, Indııanyń ánshisi Sanah Moidutty, túrik juldyzy Murat Boz bar. Qazaqstandyq óner ıeleriniń arasynda MýzART, Kaırat Nurtas, Aıqyn, Mádına Sádýaqasova, Kámshat Joldybaeva, Erke Esmahan, Álı Okapov jáne basqalary bar.
«Star of Asia» festıvaline kórermenderdi jetkizý saǵat 23:30-ǵa deıin jalǵasady. Kórermender úshin arnaıy avtobýstar uıymdastyrylyp, ár núkteden 20 kólik qatynaıdy.
Avtobýs júretin núkteler: Abaı dańǵyly, 48/1 Ortalyq stadıonnyń mańy jáne Dostyq dańǵyly men Qurmanǵazy kóshesiniń buryshy. Jolaýshylar kóligi saǵat 16:00-den 18:30-ǵa deıin júredi. «Medeýden» avtobýstar saǵat 22.00-den 23.30 aralyǵynda keri qaıtady. Jolaqy - 150 teńge.
Bıik taý shatqalyndaǵy aýa temperatýrasy qaladaǵydan tómen ári mádenı shara ótetin kúnderi jaýyn jaýyp, jel turýy múmkin. Osyǵan oraı uıymdastyrýshylar qonaqtarǵa arnap jaýyn plaştaryn daıyndap qoıdy.
