Almatyda ótetin Qazaqstan halqynyń birligi kúnine arnalǵan sherýge 700-den asa qazaqstandyq baıkerler qatysady

Olar sherýdi Jeltoqsan men Tóle bı kóshesinen bastap, saltanatty túrde «Astana» alańynan ótetin bolady. Almaty baıkerleri osylaısha qala turǵyndaryn merekemen quttyqtap, mereke kúni dástúrli baıker maýsymyn ashpaq. Qazaqstan baıkerleri osy syndy sharalary ótkizýdi dástúrge aınaldyrǵan, al baıkerler maýsymynyń ashylýy olardyń jyl saıynǵy dástúrli sharalary.

Motokolonna ári qaraı Abaı dańǵylyna jol tartyp, Ortalyq stadıonǵa, sosyn Seıfýllın jáne Belınskıı kóshelerimen júrip ótip, Qapshaǵaı jolyna shyǵatyn bolady. Qala syrtyndaǵy «Assortı» demalys ornynda olar baıkerler maýsymynyń ashylýyn atap ótpek. «Maýsym saltanatty ashylý rásimimen bastalady, sosyn ár túrli baıqaýlar men týrnırler, motoshoýlar ótkizemiz. Kontserttik baǵdarlama da qarastyrylǵan. Bizdiń dástúrli sharamyz bı keshimen jáne otshashýmen aıaqtalatyn bolady», - dedi «MOTORS» baık-klýbynyń prezıdenti, álemge tanymal qazaqstandyq baıker Dmıtrıı Petrýhın.