Almatyda ótetin halyqaralyq týrnır ondaǵan eldiń boksshylarynyń basyn qosady

QR Prezıdenti kýbogi dástúrli túrde boks derjavalarynyń myqty sportshylaryn - Olımpıada, Azııa, Panamerıka oıyndarynyń, álem, Azııa jáne Eýropa chempıonattarynyń jeńimpazdary men júldegerlerin jınaıdy. Bul bedeldi syılyqty turaqty túrde Qazaqstan ulttyq quramasy óz qanjyǵasyna baılap kele jatyr. 2006 jyly bizdiń boksshylarymyz 8 altyn medal utyp aldy, al 2010-da 6, 2012-de 7 altyn medaldi qorjynǵa saldy.

IV týrnırge álemniń 12 elinen (Ázerbaıjan, Irak, Kýba, Qyrǵyzstan, Mońǵolııa, Reseı, Tájikstan, Taıland, Ózbekstan, Ýkraına, Fılıppın jáne Qazaqstan) 104 boksshy qatysady.

Sheteldik quramalardyń qatynda Robeısı Ramırez syndy olımpıada chempıony jáne ÁCh fınalısi Arısnodıýs Dıspeın (Kýba), ÁCh birneshe dúrkin jeńimpazy Jasýrbek Latıpov (Ózbekstan), Olımpıada oıyndary (OO) men ÁCh fınalısi Tsýtsgot Nýıambaıar (Monǵolııa), álem chempıony Gavıd Chelebıev jáne OO men ÁCh júldegeri Teımýr Mammadov (Ázirbaıjan) bar.

Qazaqstan quramasynyń bas bapkeri Myrzaǵalı Aıtjanov ulttyq quramanyń úsh quramyn jarysqa shyǵarady, olardyń qatarynda byltyr Almatyda ótken álem birinshiliginde top jarǵan boksshylar da bar. Máselen, álem chempıony Birjan Jaqypov (49 kg), Іlııa Súleımenov (52 kg), ÁCh qola júldegerleri Qaırat Eralıev (56 kg) jáne Berik Abdrahmanov (60 kg), álem chempıondary Danııar Eleýsinov (69 kg) jáne Jánibek Álimhanuly (75 kg), OO men ÁCh fınalısi Ádilbek Nııazymbetov (81 kg), Anton Pınchýk (91 kg-ǵa deıin), ÁCh fınalısi, OO qola júldegeri Ivan Dychko (91 kg-nan joǵary).

QR Prezıdenti kýbogi ulttyq quramanyń Inchhonda ótetin Azııa chempıonatyna daıyndyq aıasyndaǵy qorytyndy týrnır bolmaq.

Aıta keteıik, qazirgi qazaqstandyq boksshylardyń ishinde Birjan Jaqypov pen Ivan Dychko QR Prezıdenti kýbogynda eki retten altyn medal taǵynǵan. Al Serik Sápıev óz kezinde bul tuǵyrǵa úsh ret kóterilgen.

QR Prezıdentiniń IV Kýboginiń sýpervaızeri - Álem chempıony ataǵyn eń alǵashqy bolyp jeńip alǵan qazaqstandyq boksshy Valerıı Rachkov.