Almatyda ótetin ǵylymı-tájirıbelik konferentsııa J. Ysmaǵulovtyń 85 jyldyq mereıtoıyna arnalyp otyr
ALMATY. 17 sáýir. QazAqparat - Búgin Almatydaǵy «Áýezov úıi» ǵylymı-mádenı ortalyǵynda «Qazaq ádebıettanýy: ótkeni men búgini» degen taqyrypta respýblıkalyq ǵylymı-tájirıbelik konferentsııa bolady.
M.Áýezov atyndaǵy ádebıet jáne óner ınstıtýty uıymdastyryp otyrǵan shara ádebıettanýshy, synshy, jýrnalıst, aýdarmashy, Memlekettik syılyqtyń laýreaty, Respýblıkaǵa eńbek sińirgen mádenıet qyzmetkeri, fılologııa ǵylymdarynyń doktory, professor, Qazaqstan Áleýmettik ǵylym akademııasynyń akademıgi Jumaǵalı Ysmaǵulovtyń 85 jyldyq mereıtoıyna arnalǵan. Máslıhatta QR UǴA akademıgi Serik Qırabaev, Ádebıet jáne óner ınstıtýtynyń Abaıtaný jáne jańa dáýir ádebıeti bóliminiń meńgerýshisi Serikqazy Qorabaı, fılosofııa ǵylymdarynyń kandıdaty, professor Qanapııa Ahmetov,Qazaqstan Jazýshylar odaǵynyń hatshysy Jumabaı Shashtaıuly, «Qazaqstan» baspasynyń dırektory Nurmahan Orazbek, Abaı atyndaǵy QazUPÝprofessory Temirhan Tebegenov, jazýshy, jýrnalıst Sarbas Aqtaev, «Qazaq» gazetiniń bas redaktory Qoǵabaı Sársekeevsyndy qalamgerler baıandama jasap, estelikterin aıtady. Konferentsııada Jumaǵalı Ysmaǵulov týraly «Perzenti edi halqynyń» atty estelikter men lebizder kitabynyń tusaýkeseri bolady.
Qostanaı oblysy Sarykól aýdany Sonaly aýylynda 1928 jyly 17 sáýirde ómirge kelgen qoǵam qaıratkeri 2011 jyly 17 qańtarda dúnıeden ozdy. Eńbek jolyn árip terýshiden bastaǵan J.Ysmaǵulov 1943-54 jyldary birqatar baspasóz organdarynda, 1954-58 jyldary QazKSR Kompartııasy Ortalyq komıtetinde nusqaýshy bolyp qyzmet atqardy. Odan keıin 1961-63 jyldary "Qazaq ádebıeti" gazetinde bas redaktor, 1963-64 jyldary Almaty oblystyq "Jetisý" gazetinde bólim meńgerýshisi, 1965-69 jyldary Shyǵys Qazaqstan oblystyq "Kommýnızm týy" gazetinde jaýapty redaktordyń orynbasary, 1969-73 jyldary Partııa tarıhy ınstıtýtynda sektor meńgerýshisi, al 1973 jyldan Qazaq KSR Mınıstrler keńesi janyndaǵy Memlekettik aqparat agenttiginde (QazTAG) dırektordyń orynbasary, 1982-87 jyldary dırektory boldy. 1987 jyldan keıin ǵylym jolyna bet buryp, 1994 jyly fılologııa ǵylymynyń doktory, 1998 jyly professor atandy. QR Memlekettik syılyǵynyń ıegeri, "Halyqtar dostyǵy", "Qurmet belgisi" ordenderimen jáne birqatar medaldarmen marapattalǵan.
