Almatyda ótetin Eýroodaq-Qazaqstan ekonomıkalyq forýmyna Kıprdiń isker toptary qatyspaq

NIKOSIıA. QazAqparat – Qazaqstan Elshisi Satybaldy Burshakov Kıpr Prezıdenti Nıkos Hrıstodýlıdıspen kezdesti, dep habarlaıdy QazAqparat Syrtqy ister mınıstrliginiń resmı saıtyna silteme jasap.

Qazaqstan Elshisi Satybaldy Burshakov Kıpr Prezıdenti Nıkos Hrıstodýlıdıspen áńgimelesý barysynda Prezıdent Qasym-Jomart Toqaevtyń quttyqtaý hatyn jetkizdi. Memleket basshysyna izgi tilekterin joldaǵan N. Hrıstodýlıdıs ekijaqty qarym-qatynastardyń deńgeıin joǵary baǵalap, bolashaqta Qazaqstanǵa saparmen barýǵa qyzyǵýshylyq tanytty.

Budan bólek, Nıkosııaǵa sapary barysynda S. Burshaqov Kıprdiń jańa Úkimet músheleri – Ádilet jáne qoǵamdyq tártip mınıstri Anna Kýkkıdıs-Prokopıýmen jáne Energetıka, saýda jáne ónerkásip mınıstri Iorgos Papanastasıýmen kelissózder júrgizdi. Dıplomat Kıpr resmı ókilderin Qazaqstandaǵy aýqymdy saıası jáne ekonomıkalyq reformalardyń júzege asyrylýy, sondaı-aq jýyrda ótken parlamenttik saılaýdyń nátıjeleri týraly habardar etti.

A. Kýkkıdıs-Prokopıýmen kezdesýde Kıpr tarapy Elshige 2022 jyly elderimiz arasynda qol qoıylǵan ózara quqyqtyq kómek jáne ekstradıtsııalaý týraly sharttardy Ókilder palatasynda ratıfıkatsııalaǵany jaıly málimdedi. Sondaı-aq, Qazaqstan-Kıpr yntymaqtastyǵynyń sharttyq-quqyqtyq bazasyn odan ári keńeıtý týraly ýaǵdalastyqqa qol jetkizildi.

Energetıka, saýda jáne ónerkásip mınıstrliginde aldaǵy mamyrda Almatyda ótetin Eýroodaq-Qazaqstan ekonomıkalyq forýmy aıasynda ekonomıkalyq yntymaqtastyqtyń kún tártibi men elimizdiń ınvestıtsııalyq áleýeti talqylandy. Mınıstr I. Papanastasıý Almatyǵa sapary barysynda qazaqstandyq jáne kıprlik kásipkerlerdiń qatysýymen ótetin bıznes-konferentsııaǵa qatysatyn isker toptardyń delegatsııasyn basqarady dep josparlanǵan.