Almatyda ótetin dástúrli taý sporty festıvali úsh kúnge uzartyldy
ALMATY. QazAqparat - Shildeniń 28-i men 30-y aralyǵynda «Shymbulaq» taý-shańǵy kýrortynda «Іnternational Mountain Sports Festival» halyqaralyq taý sporty festıvali ótedi, dep habarlaıdy QazAqparat tilshisi.
Uıymdastyrýshylar halyqaralyq festıvaldi forýmmen bastap, sporttyq sharalarmen jalǵastyrmaq. Almaty qalasynyń Dene shynyqtyrý jáne sport basqarmasynyń basshysy Ábil Dóńbaev bıyl bul festıvaldiń aıasyn keńeıtip, byltyrǵymen salystyrǵanda mazmundyq jaǵyna kóp mán berilip otyrǵanyn aıtty.
«Osy festıvaldiń aıasyn keńeıtip otyrmyz. Byltyr bir kún ǵana bolsa, bıyl týrızm salasyndaǵy sarapshylardy shaqyrtyp, jan-jaqty nasıhattaı túspekpiz. Forýmda bizdiń damý baǵytymyzdy álemdik tájirıbemen salystyryp kórmekpiz. Jalpy, Medeý, Shymbulaq shatqalynyń tolyq múmkindigin tanytqymyz keledi. Maqsatymyz - halyqty barynsha kóbirek sportqa baýlý. Jalpy, Almatyda qysqy sportqa kerekti ınfraqurylym tolyq bar», - deıdi Almaty qalasynyń Dene shynyqtyrý jáne sport basqarmasynyń basshysy Ábil Dóńbaev.
Halyqaralyq festıval Almaty qalasynyń ımıdjin, halyqaralyq jáne otandyq sport týrızmin nyǵaıtý jáne odan ári damytý, taýly sport túrlerin nasıhattaý men elge tanytýdy maqsat tutyp otyr. Sharanyń basty uıymdastyrýshysy «Shymbulaq» taý-shańǵy kýrortynyń marketıng bóliminiń basshysy Vladıslav Semenov úsh kúngi baǵdarlama týraly aıtyp berdi.
«Forým úsh kún ótedi. Onda týrızm salasyndaǵy halyqaralyq sarapshylar óz tájirıbelerimen bólisedi. Biz óz tarapymyzdan sharanyń onlaın-translıatsııasyn uıymdastyramyz. Senbi kúni mýzykalyq-sport festıvali ótedi. Onda otbasymen kelip demalýǵa bolady. Bul sharaǵa Olımpıada chempıondary, tanymal sportshylar keledi dep oılap otyrmyz. Jeksenbi kúni alpınııada bolady. Tańǵy 5-ten balalardy 4000 metrlik shyńǵa aparamyz. Jarys kúnderi Medeýden Shymbulaqqa baratyn avtobýs tegin qatynaıdy», - deıdi «Shymbulaq» taý-shańǵy kýrortynyń marketıng bóliminiń basshysy Vladıslav Semenov.
