Almatyda ótetin «Bıtlz» festıvaline Ulybrıtanııa Elshisi qatysyp, án oryndaıdy
ALMATY. Tamyzdyń 18-i. QazAqparat /Erbol Azanbek/ - Almatyda ótetin brıtandyq áıgili «Bıtlz» tobynyń 50, top múshesi Djon Lennonnyń 70 jyldyq mereıtoıyna arnalǵan festıvalǵa Ulybrıtanııanyń Qazaqstandaǵy elshisi Devıd Moran qatysyp, ansanbl repertýarynan án oryndaıdy.
Bul týraly búgin sharanyń uıymdastyrýshysy «Tabıǵat» ekologııalyq odaǵynyń tóraǵasy Mels Eleýsizov arnaıy ótken baspasóz máslıhatynda málim etti.
Esterińizge sala keteıik, tamyzdyń 30-y kúni Almatydaǵy Astana alańynda brıtandyq mýzykanttardyń mereıtoılaryna arnalǵan festıval ótedi. Mels Eleýsizovtyń aıtýynsha, sharaǵa 30-ǵa jýyq saıasatker, ánshiler men tanymal qaıratkerler qatysady. Olardyń qatarynda Ǵanı Qasymov, Nurlan Abdýllın, Tolqyn Zabırova syndy tulǵalar bar. Festıvalde Eleýsizovtyń ózi áıgili toptyń «Let it Be» ánin oryndamaq. «Shara eshqandaı jarnamalyq maqsatty kózdemeıdi. Maqsat - áıgili toptyń naǵyz ánderin estip, ótken shaqty eske alý. Óıtkeni aǵa býyn qazirgi jastardyń ánin kóp túsine bermeıdi», deıdi «Tabıǵat» EO kóshbasshysy. Onyń aıtýynsha, festıvaldiń ótetindigi týraly aǵylshyn patshaıymy da habardar kórinedi. «Festıval tegin bolady. Qatysýshylar da tegin óner kórsetýge yqylas tanytyp otyr. Sharanyń ótýine Brıtan keńesi, Almaty ákimdigi, Ulybrıtanııanyń Qazaqstandaǵy Elshiligi qoldaý kórsetip otyr», deıdi festıvaldiń uıymdastyrýshysy. Tabıǵattyqtardyń aıtýynsha, aǵylshyn ánshilerine kórsetiletin qurmet bunymen bitpeıdi. Festıvaldiń erteńine qala ákimshiligi bólip bergen jerge 70 aǵash otyrǵyzyp, Djon Lennonnyń atyndaǵy alleıa ashylmaq.
