Almatyda otbasyna zábir kórsetken 26 agressor májbúrlep emdeýge jiberildi

ALMATY. QazAqparat - Almaty qalasynyń jergilikti polıtsııa qyzmeti áıelderge qatysty zorlyq-zombylyq, quqyq buzýshylyqtar týraly aıtyldy, dep habarlaıdy QazAqparat tilshisi.

Almaty jergilikti polıtsııa qyzmetiniń málimetinshe, jyl basynan beri áıelderdi zorlyq-zombylyqtan qorǵaý tobynyń ınspektoryna jeke qabyldaýǵa 173 áıel júgingen.

Olar boıynsha aldyn alý sıpatynda 139 shara qabyldanǵan. 9 áıel ýaqytsha baspanaǵa ornalastyryldy, 15 áıel daǵdarys ortalyǵyna jiberildi.

«Túrksib aýdanynyń ýchaskelik polıtsııa ınspektorlary otbasylyq janjalǵa qatysty 524 qorǵaý nusqamasyn shyǵardy, adamnyń minez-qulqyna 28 erekshe talap belgilendi, otbasy-turmystyq qatynastar salasynda ákimshilik quqyq buzýshylyq jasaǵany úshin 193 adam ákimshilik jaýapkershilikke tartyldy, 26 agressor májbúrlep emdeý oryndaryna ornalastyryldy. Tájirıbe kórsetkendeı, agressorlar - kóbine alkogol, esirtki, qumar oıyn, radıkaldy dinı aǵymdy jaqtaýshylar, patologııalyq qyzǵanyshtan zardap shegetin adamdar»,- deıdi jergilikti polıtsııa qyzmeti.

Qazirgi tańda áıelderdi zorlyq-zombylyqtan qorǵaý bólimshesi 15 úkimettik emes uıymmen, onyń ishinde baspanasy bar ortalyqtarmen ózara tyǵyz is-qımyl jasaıdy.

Aıta keteıik, turmystyq zorlyq-zombylyq qurbandary jumys kúnderi jumys ýaqytynda jáne kez kelgen ýaqytta 102 nómiri boıynsha qoljetimdi 298-54-25 senim telefonyna júgine alady.