Almatyda otbasylyq dárigerlik ambýlatorııalardyń sany artady
Jıyn Almaty qalasy ákiminiń orynbasary Ásem Núsipovanyń tóraǵalyǵymen ótti.
Alqa otyrysynda ana men bala ólimin azaıtý, medıtsına kadrlarynyń tapshylyǵyn sheshý máseleleri qaraldy.
Sondaı-aq aldaǵy ýaqytta júzege asyrylatyn jumys jospary saralanyp, mindetti medıtsınalyq saqtandyrý qorynyń jumysy sóz boldy.
Narıman Tabynbaev Almaty qalasyndaǵy densaýlyq saqtaý salasyn odan ári damytý jáne medıtsınalyq kómek kórsetý standarttaryna sáıkes bolý úshin densaýlyq saqtaý júıesin jańǵyrtý kerektigin aıtty.
«Jańa otbasylyq dárigerlik ambýlatorııalar salý arqyly azamattarǵa BMSK qyzmetteriniń qoljetimdiligin arttyrý qajet. Sondaı-aq, mamandandyrylǵan qyzmetterdi damytý jáne qala shetindegi eldi mekenderde turatyn halyqtyń joǵary mamandandyrylǵan kómekke qoljetimdiligin qamtamasyz etý máselesi ótkir bolyp tur»,- dedi basqarma basshysy.
Al, qoǵamdyq densaýlyq basqarmasy basshysynyń orynbasary Laýra Myrzaǵalı ana men bala ólimine qatysty máseleni kóterdi.
«Ókinishke qaraı, osyndaı problema bar. Sondyqtan atalǵan máseleniniń aldyn alý úshin ana men balany qorǵaý bólimi men BMSK qyzmetin baqylaýda ustaý qajet. Sondaı-aq áıelder konsýltatsııasy jáne perzenthanalardyń jumysyn kúsheıtý kerek. Bul perzenthanalardy kópbeıindi statsıonarlarmen biriktirý arqyly mamandandyrylǵan medıtsınalyq kómek kórsetýdiń mýltıdıstsıplınarlyq qaǵıdatyn iske asyrýǵa, júkti áıelderge medıtsınalyq kómektiń sabaqtastyǵy men sapasyn qamtamasyz etýge múmkindik beredi»,- dedi Laýra Myrzaǵalı.
Jıyn barysynda qoǵamdyq densaýlyq basqarmasy basshylyǵyna megapolıs turǵyndaryna medıtsınalyq qyzmetterdiń sapasy men qoljetimdiligin odan ári arttyrý mindeti júkteldi.
Almaty qalasy ákiminiń orynbasary Ásem Núsipova «Deni saý ult» ulttyq jobasynyń, mamandandyrylǵan qyzmetterdiń jol kartalarynyń kórsetkishteri men ındıkatorlaryna qol jetkizý boıynsha sharalar qabyldaý - basym baǵyttardyń biri ekenin atap ótti.