Almatyda Otbasy kúni merekesine qatysýshy januıalardyń sany 2 myńnan asty
ALMATY. QazAqparat - Almatyda FAMILY PARK saıabaǵynda Otbasy kúni merekesi atap ótilip jatyr. Búgin senbi bolǵandyqtan saıabaqqa kelýshiler sany barǵan saıyn arta túsýde.
Uıymdastyrýshylardyń aıtýynsha, tústen keıin saǵat 16:00-ge qaraı, tek resmı tirkelgen januıalardyń sany eki myńnan asqan. Al árbir otbasynyń kem degende 3-4 múshesi bolatyny belgili.
«FAMILY PARK saıabaǵynda Otbasy kúni merekesin toılaý búgin tańǵy saǵat 10:00-de bastaldy. Ol keshki saǵat 20:00-ge deıin jalǵasady. Negizgi sahnada anımatorlar ár túrli qoıylymdar kórsetip jatyr. Balalarmen ár túrli oıyndar uıymdastyrylýda. Keshke qaraı bı flesh-mobtary bolady. Balalar shyǵarmashylyq ujymdary kontsert beredi. Saıabaqtyń amfıteatrynda «ArtIshok» teatry teatrlandyrylǵan qoıylymdar kórsetedi. Búgingi sharaǵa kelgen otbasylar tirkelýi tıis. Eger tirkelse, olarǵa rettik nómir jazylǵan, túımedaq gúliniń beınesi bar qaǵaz beriledi. Otbasy músheleri olardy keýdesine japsyryp alady. Árbir eki saǵat saıyn osy túımedaqtar boıynsha utys oınatylady. Jeńimpazdarǵa baǵaly syılyqtar beriledi. Qazirdiń ózinde tirkelgen januıalardyń sany eki myńnan asty. Keshke qaraı adamdar sany arta túsedi degen úmittemiz, - dedi óz sózinde búgingi sharany uıymdastyrýshy «Riks» JShS basshysy Marına Lapına.
Elimizde sońǵy jyldary Otbasy kúni merekesi jyl saıyn qyrkúıek aıynyń ekinshi jeksenbisi kúni atap ótiledi. Marına Lapına bul merekeniń nege búgin uıymdastyrylyp jatqanynyń sebebin bylaısha túsindirdi.
«Shyn mánisinde álemde Otbasy kúnine baılanysty naqty bir belgilengen kún joq. Ol kerek te emes. Árbir el, árbir qala Otbasy kúnin óz erkinshe atap óte alady. Mysaly osy taıaýda 8-shi shilde kúni 60-tan astam el, onyń ishinde Reseı de bar, Otbasy kúnin dúrkiretip atap ótti. Osy ekpinmen bizde atap ótýdi jón kórdik. Otbasy - bul qoǵamnyń uıashyǵy. Otbasy - ómirdegi basty qundylyq. Sondyqtan bizdiń basty maqsatymyz - adamdardy otbasynyń bereke-birligin saqtaýǵa, tatýlyqqa shaqyrý, otbasy qundylyqtaryn dáripteý», - dedi M. Lapına.
Aıta ketelik, búgin merekege baılanysty saıabaqta birneshe belsendilik aımaǵy jumys istep jatyr. Mysaly «Qolóner» alańshasynda balalar daıyn buıymdardan ár túrli áshekeıler jasasa, «Úı salýshylar» aımaǵynda otbasy músheleri birlesip, arnaıy daıyn kartonnan úıshikter jasaıdy. Al «Ákem, anam jáne men - sporttyq januıamyz» alańshasynda otbasy músheleri ár túrli sporttyq jarystarǵa qatysady. Jeńimpazdarǵa ár túrli baǵaly syılyqtar tabys etiledi.
