Almatyda «Otanym júregimde» atty Respýblıkalyq beıneklıpter baıqaýy ótedi

Bul týraly búgin Almatyda atalmysh sharaǵa oraı arnaıy ótkizilgen baspasóz máslıhatynda aıtyldy, dep habarlaıdy QazAqparat.

«Búgingi kúni ósip kele jatqan jas jetkinshekterge patrıottyq tárbıe berip, otansúıgishtik sezimderge baýlıtyn beıneklıpter joqtyń qasy. Sondyqtan, bul sharanyń maqsaty - óz mádenıetimiz ben tarıhymyzdy, týǵan elimizdi, jerimizdi, Otanymyzdy nasıhattaıtyn klıpterdi damytý. Sondaı-aq, jastarǵa sanaly tárbıe berip, ádeptilikke úıretetin beıneklıpter sanyn kóbeıtý. Bul tarapta Elbasy bıylǵy Joldaýynda Uly Otan soǵysynyń 65 jyldyǵynyń mańyzdylyǵyn - óskeleń urpaq arasynda keńinen nasıhattalýyn erekshe atap ótken bolatyn», dedi «Jas Otan» jastar qanaty «Zańǵar» shyǵarmashylyq birlestiginiń tóraǵasy Aıdar Qyryqbaı. Onyń aıtýynsha, baǵdarlama barysynda Uly Otan soǵysyna qatysqan ardagerlerge arnalǵan kontserttik qoıylymdar qoıylyp, olarǵa arnaıy baǵaly syılyqtar tabystalady.

Ońtústik Qazaqstan oblysy mádenıet basqaramasynyń bastyǵy Aıdar Nııazovtyń aıtýynsha, baıqaýǵa Astana, Almaty, Óskemen, Oral, Petropavl, Qostanaı, Túrkistan, Kókshetaý jáne Qyzylorda qalalarynan 30-ǵa jýyq jumys kelip túsken. «Onyń ishinen búgin 24-i iriktelip alyndy. Bizdi jyldan jylǵa bul baıqaýǵa qatysýshylar sanynyń artyp kele jatqany qýantady», dep atap ótti ol.

Baıqaýǵa jumystar 5 atalym boıynsha tańdap alynady. Oǵan «Qazaqfılm» kınostýdııasynyń Bas redaktory Dıdar Amantaıdyń tóraǵalyǵymen qurylǵan qazylar alqasy tórelik jasaıdy. Júldegerler estelik dıplomdarmen jáne baǵaly syılyqtarmen marapattalatyn bolady.

Baspasóz máslıhaty barysynda buǵan deıin halyq arasynda júrgizilgen saýalnamanyń qorytyndysy boıynsha, úzdik dep tanylǵan telebaǵdarlamalar men tilshiler QR Baılanys jáne aqparat mınıstrligi jáne Ońtústik Qazaqstan oblysy ákiminiń arnaıy «Alǵys hatymen» marapattaldy. Shara sońynda tilshilerdiń qurmetine Oqýshylar saraıy janynan alleıa ashyldy. Olar shyrsha aǵashtaryn otyrǵyzyp, estelik taqta ornatty.