Almatyda otandyq taýar óndirýshilerdi qoldaý kúsheıtiledi

ALMATY. QazAqparat - Almatyda jergilikti taýar óndirýshilerdi qoldaý jumys toby qurylady. Bul qala ákiminiń orynbasary Maqsat Qıqymovtyń qatysýymen ótken Jergilikti qamtýdy baqylaý jónindegi komıssııanyń kezekti otyrysynda aıtyldy, dep habarlaıdy QazAqparat.

Óńirlik keńes tóraǵasy Maksım Baryshev bastaǵan Almaty qalasynyń bıznes-qoǵamdastyǵy qazaqstandyq taýar aınalymyna, sondaı-aq jergilikti kásiporyndardy qoldaý sharalaryna yqpal etetin birqatar máselelerdi kóterdi.

Otyrys barysynda qala ákiminiń orynbasary Maqsat Qıqymov oryn alǵan máselelerge keshendi túrde qaraýdy jáne bas merdigerlerdiń bıýdjettik baǵdarlamalarynyń ákimshilerimen apta saıyn kezdesip, árbir jaǵdaıdy jeke qarastyratyn Almaty qalasy Kásipkerler palatasynyń Óńirlik keńes múshelerinen jumys tobyn qurýdy usyndy.

Mundaı pikirtalas olardyń arasynda týyndaǵan máselelerdi sheshýge yqpal etedi. Jumys tobyn qurýdyń basty maqsaty – jergilikti taýar óndirýshilerdi qoldaý.

Óz kezeginde Óńirlik keńes basshysy Maksım Baryshev bul bastamany qoldap, sondaı-aq memlekettik satyp alýdaǵy ımportty baqylaý maqsatynda kásiporyndarǵa kóshpeli monıtorıngtik toptar qurýdyń mańyzdylyǵyn atap ótti.

Іs-sharaǵa Almaty qalasy Kásipkerler palatasy Óńirlik keńesiniń tóraǵasy Maksım Baryshev, Óńirlik kásipkerler palatasynyń dırektory Aıtýar Qoshmambetov, jergilikti atqarýshy organdar men bıznes-qoǵamdastyǵynyń ókilderi qatysty.