Almatyda otandyq fılmderdi nasıhattaıtyn «Amanat» kınoklýby ashyldy (FOTO)
ASTANA.QazAqparat - QR BǴM Ǵylym komıtetiniń janyndaǵy «Ǵylym ordasy» respýblıkalyq memlekettik kásipornynda Sháken Aımanov atyndaǵy «Qazaqfılm» AQ-nyń bastamasymen «Amanat» kınoklýbynyń saltanatty ashylýy bolyp ótti.
Atalmysh kınoklýbtyń maqsaty - otandyq fılmderdi nasıhattaý jáne bedelin arttyrý bolyp tabylady. Bul rette kınkoklýb kórkem jáne derekti fılmderdi turaqty túrde kórermen nazaryna usynyp, shyǵarmashylyq toppen kezdesýler uıymdastyryp turýdy kózdeıdi. Kınoklýbtyń tusaýkeserinde kórermen nazaryna «Amanat» kórkem fılmi usynyldy. Bul kartına daryndy tulǵa, ataqty ǵalym, «XIX ǵasyrdyń 20-40-shy jyldaryndaǵy Qazaqstan» kitaby úshin Qazaqstan jáne Orta Azııa elderinde tuńǵysh ret tarıh ǵylymdarynyń doktory ataǵyna ıe bolǵan Ermuqan Bekmahanovtyń taǵdyrynan syr shertedi. Fılmniń tanystyrylymyna rejısser Satybaldy Narymbetov, sonymen qatar basty rólderde oınaǵan akterler Qarlyǵash Muhamedjanova, Ázız Beıshenálıev jáne Sanjar Mádıev qatysty. - Men «Amanat» kınoklýbynyń tusaýkeserine kýá bolǵanymdy jáne kınoklýbtyń bizdiń kartınamyzben attas bolǵanyn maqtan tutamyn. Ermuqan Bekmahanovtyń taǵdyry - bul patrıotızmniń bıik shyńy, otandy súıe bilýdiń laıyqty kórinisi. Qazaq ǵylymyndaǵy osy erekshe qubylysty kórermenge kórkem túrde jetkizý úshin bizdiń túsirý tobymyz 5 jyl boıy aıanbaı eńbek etti, - dep Satybaldy Narymbetov júrekjardy pikirin bildirdi. «Amanat» kınoklýbynyń ashylý saltanatyna KSRO Halyq ártisi Asanáli Áshimov, «Ǵylym ordasy» RMK-nyń bas dırektory Roza Káribjanova, Ermuqan Bekmahanovtyń jubaıy Halıma Bekmahanova men ǵalymnyń ul-qyzdary, «Qazaqfılm» kınostýdııasynyń ókilderi jáne belgili qoǵam jáne óner qaıratkerleri qatysty.
