Almatyda osteoporoz máselesi talqylanýda
ALMATY. Qazannyń 18-i. QazAqparat /Názıra Eleýhan/ - Búgingi tańda qazaqstandyqtar arasynda súıektiń syný qaýpi (osteoporoz) sút bezi ragy ósýinen 8 ese joǵary.
Bul týraly búgin Almatyda ótken arnaıy baspasóz máslıhatynda osteoporoz jónindegi dárigerler qaýymdastyǵynyń prezıdenti Gúljan Ǵabdýllına málim etti.
Onyń aıtýynsha, jyl basynda qolǵa alynǵan "Shyǵys Eýropa jáne Ortalyq Azııada aımaqtyq aýdıt. Epıdemıologııa jáne áleýmettik-ekonomıkalyq saldar. 2010 jyl" atty halyqaralyq baǵdarlama aıasynda elimizde osteoporoz máselesiniń jaǵdaıyna aýdıt júrgizilgen. "Statıstıka kóńil qýantalyq emes. Aýdıttiń aldyn alý málimetteri keleńsiz boljamdardy kórsetti jáne Qazaqstanda osteoporoz synyǵy bar naýqastarǵa medıtsınalyq kómek kórsetý jaǵdaıynyń nashar ekendigi anyqtaldy. 50-45 jas aralyǵyndaǵy naýqastardyń súıektegi mıneraldyq tyǵyzdyǵynyń jaǵdaıyn teksergen kezde 33,33 paıyz jaǵdaıynda (er kisilerde 27,27 paıyz jáne áıelderde 37,50 paıyz) osteopenııa anyqtaldy jáne áıelderdiń 12,50, er kisilerdiń 9,09 paıyzynda osteoporoz bar ekendigi belgili boldy", dep atap ótti Gúljan Ǵabdýllına.
Onyń paıymdaýynsha, elimizde kaltsııdi paıdalanýdyń ortasha kórsetkishi Dúnıejúzilik densaýlyq saqtaý uıymy belgilegen mólsherden tómen. "Turǵyndardyń kóp bóligi kaltsıımen qatar, D dárýmeniniń tapshylyǵyn tartyp otyr. Munyń bári súıek ulpasyn buzyp qane qoımaı, rahıt keselin de týǵyzady. Sondyqtan turǵyndarǵa kásibı deńgeıde kómek kórsetýdi qazirden bastap oılaý kerek. Bul mindetti memlekettiń ortalyqtandyrylǵan qoldaýy arqyly sheshýge bolady", - dep usynysyn bildirdi ol.
Gúljan Ǵabdýllına sonymen qatar qazirgi ýaqytta osteoporozdy anyqtaýdyń tıimdi tásili DXA tehnologııasymen aımaqtardy qamtamasyz etý kerek dep atap ótti. "Bul ádis tek iri qalalarda ǵana, atap aıtqanda Astana, Almaty, Qaraǵandy jáne Pavlodarda bar. 1 mıllıon adamǵa bar bolǵany 0,3 densıtometrden keledi. Sonymen qatar emdeýge arnalǵan preparattardy memleket tólemegendikten, kóptegen turǵyndardyń dári-dármekke qoldary jetpeı júr", - dedi ol.
Qazaq ulttyq medıtsınalyq ýnıversıtetiniń ambýlatorııalyq-emhanalyq terapııa kafedrasynyń meńgerýshisi Baqytsholpan Isaevanyń aıtýynsha, osteoporoz máselesi Almaty jáne Almaty oblysynda keń taralǵan. "Bul aımaqta ıodty paıdalaný deńgeıiniń tómendiginen uıqy beziniń keselderi jıi kezigýde. Bul osteoporoz damýyna ákep soqtyratyn birden bir sebep", - dedi ol.
Almaty qalasynyń dárigerlerdi jetildirý ınstıtýtynyń professory, medıtsına ǵylymdarynyń doktory Orazbaı Ábdirazaqovtyń paımdaýynsha, ásirese, bel súıegi synǵan naýqastarǵa medıtsınalyq kómek kórsetý jaǵdaıyn jaqsartý qajet. "Batys Eýropada bel súıegi synǵan naýqastardyń kóbi operatıvti ádispen emdeledi, ol emdeýdiń optımaldy standarty bolyp sanalady, al elimizde hırýrgııalyq emdeýdiń kórsetkishi óte tómen. Osyǵan baılanysty súıek synǵannan keıin ólip ketý qaýpi óte joǵary", - dep atap ótti ol.
