Almatyda osteoporoz kúnine arnalǵan áleýmettik aktsııa ótip jatyr
ALMATY. Qazannyń 20-sy. QazAqparat /Názıra Eleýhan/ - Búgin Halyqaralyq osteoporoz kúni. Almatyda atalmysh kúnge oraı jáne Qarttar aılyǵy aıasynda №5-shi men №8-shi jáne qalanyń birneshe jeke menshik emhanalarynda áleýmettik aktsııa ótip jatyr. Sharanyń uıymdastyrýshylary - Osteoporoz jónindegi dárigerler qaýymdastyǵy men Qazaqstan sút odaǵy.
Ashyq esik kúni súıek tininiń tyǵyzdylyǵyn anyqtaǵysy keletinder úshin tegin densıtometrııalyq tekserýler jasalyp, keńester berildi. Atalmysh salanyń dárigerleri úshin arnaıy dárister uıymdastyryldy. Shara barysynda Qazaqstan sút odaǵy osteoporoz aýrýynyń aldyn alatyn jáne quramynda kaltsııi kóp ónim bolyp tabylatyn sút ónimderin ár kelýshige tegin taratyp, qaıyrymdylyq sharasyn ótkizdi. Atalmysh shara búgin keshke deıin jalǵasady.
"Kaltsııdi adam aǵzasyna kóp mólsherde jetkizýshi ónimniń biri sút ekendigi belgili. Bul taǵamnyń Qazaqstanda jalpy tutyný deńgeıi óte tómen, degenmen, sońǵy 5 jyl ishinde kórsetkishter alǵash ret joǵarylaǵandyǵyn kórsetip otyr. Bul qýantarlyq jaǵdaı. Biz óz tarapymyzdan osteoporoz aýrýynyń aldyn alý úshin jáne jalpy densaýlyqqa paıdaly sútti barlyq jastaǵy adamdarǵa kúnine kem degende 200-250 gramm ishý kerek degen usynysymyzdy bildiremiz", dedi Qazaqstan sút odaǵynyń ókili Marına Voronova.
«Qazaqstanda osteoporoz máselesi dúnıejúzinde sııaqty, densaýlyq saqtaý júıesiniń ózekti máseleleriniń biri bolyp otyr. Sońǵy jyldary bul aýrýdyń taralýy kúnnen kúnge artýda. Ókinishke oraı, búgingi kúni bul aýrýǵa balalar da shaldyǵýda. Bul aýrýdyń qaýipti ekenin ár bir azamat bilýi tıis. Bizdiń emhanada tirkeýde turǵandardyń 30-35 paıyzynda osteoporoz aýrýyna qaýip bar. Bizde arnaıy tekseretin medıtsınalyq apparat bolmaǵandyqtan, biz emdelýshilerdi basqa emhanalarǵa tekserýge jiberýge májbúrmiz. Al búgingi, jylyna bir ret múmkindik beriletin mundaı shara qoǵam nazaryn osteoporoz máselesine aýdarýǵa jáne halyqqa bul aýrýdyń aldyn alý profılaktıkasyn túsindirýge múmkindik beredi», dedi №5-shi qalalyq emhananyń bas dárigeri Gúlshahıra Qambarova. Onyń aıtýynsha, súıek ulpasynyń jaǵdaıyn zertteýge arnalǵan qazirgi zamanǵy ádister - ýltradybystyq densıtometrııa, qosenergetıkalyq rentgen absorbtsıometrııasy ár emhanada bolýy kerek.
Osteoporoz jónindegi dárigerler qaýymdastyǵynyń prezıdenti Gúljan Ǵabdýllınanyń aıtýynsha, osteoporoz aýrýyn aldyn alý úshin turǵyndar kóp qozǵalýlary qajet, dene jattyǵýlaryn jasaýy kerek, kaltsıı jáne D vıtamıni bar taǵamdardy, sút ónimderin jetkilikti paıdalaný kerek.
Dúnıejúzilik osteoporozdyń aldyn alý kúni - Dúnıejúzilik densaýlyq saqtaý uıymynyń qoldaýymen, Ulybrıtanııanyń Ulttyq osteoporoz qoǵamynyń uıymdastyrýymen 1999 jyldan bastap atalyp ótiledi. Bul kúni barlyq emhanalarda aldyn alýǵa arnalǵan ár túrli sharalar ótkizilip turady.
