Almatyda órttiń 60 paıyzy jeke turǵyn úı sektorynda bolady
ALMATY. QazAqparat - Bıylǵy jylytý maýsymynda Almatyda 671 órt tirkeldi. Bul týraly Almaty qalasy tótenshe jaǵdaılar departamenti basshysynyń orynbasary Samat Asaınov onlaın brıfıngte aıtty, dep habarlaıdy QazAqparat tilshisi.
Onyń aıtýynsha, bıyl órtten zardap shegýshiler sany 26 paıyzǵa azaıyp, 31 adamdy quraǵan. Órtten 38 adam qutqarylyp, 235 adam qaýipti aımaqtan shyǵaryldy.
«Órtterdiń 60 paıyzy jeke turǵyn úı sektorynda oryn alatynyn eskere otyryp, ótken jyldyń tamyz aıynan bastap turǵyndarǵa aýqymdy úgit-nasıhat túsindirý jumystaryn júrgizý bastaldy. Barlyǵy 145 471 jeke turǵyn úı esepke alyndy, qatty otyn paıdalanatyn 1848 úı tolyqtaı tekserýden ótkizildi, onyń ishinde 605 áleýmettik az qamtylǵan otbasylardyń úıi qaıta tekserilip (2 ret), órt qaýipsizdigi týraly 300 myńnan astam eskertpeler taratyldy. Órttiń 402-si jeke turǵyn úıde bolǵan. Ondaǵy basty sebep - órt qaýipsizdigine nemquraıly qaraý, ıaǵnı órt qaýipsizdigi erejeleriniń saqtalmaýy jáne peshti tazalamaý bolyp otyr. Sondaı-aq, eki órt balalardyń oıynynan bolǵan», - dedi Samat Asaınov.
Sonymen qatar, ol adam shyǵyny bolǵan 7 oqıǵada turǵyndardyń mas bolýynan órt shyqqanyn aıtty. Qalǵan jaǵdaıda órt elektr quraldaryn tún kezinde qoldanýdan shyqqan.
«Jylytý maýsymynda órtti boldyrmas úshin TJD qyzmetkerleri keshendi túrde túsindirý jumystaryn júrgizip jatyr. Sonyń aıasynda áleýmettik jaǵynan az qamtylǵan otbasylardyń úıine elektr symdaryn tartý, jylý qubyryn júrgizý, peshti tazalaý sııaqty jumystar atqaryldy», - deıdi ol.
Almaty qalasy TJD 2020-2021 jylǵy jylytý maýsymynda órt oqıǵalaryn jáne adamdardyń jaraqat alýyn boldyrmaý úshin tómendegi negizgi erejelerdi saqtaý qajettigin eskertedi:
- gaz quraldaryn qoldanýda qaýipsizdik sharalaryn saqtaý;
- jylytý peshteri men gaz aspaptarynyń janynda Jıhaz jáne basqa da janǵysh zattardy ornalastyrmaý, sondaı-aq kıim men otyndy keptirmeý;
- aqaýly elektr rozetkalaryn, elektr ajyratqyshtardy jáne elektr aspaptaryn paıdalanýǵa bolmaıdy;
- elektrplıtalary men útikter, elektrsháınekteri men kerosın quıylǵan ydystardy otqa tózimdi oryntaqqa ornatyńyz;
- jylý berý kezeńinde, jylytý peshteriniń murjalaryn, kúıe qubyrlaryn tazartyńyz;
- ot jaǵatyn peshtiń aldyndaǵy edenge ólshemi keminde 50h70 santımetr bolatyn qatty temir tósenish bekitý.
