Almatyda órttiń 12 paıyzy pırotehnıka ónimderinen shyǵady
«Órtti baqylaý basqarmasynyń basshysynyń aıtýynsha, jyl saıyn Almaty qalasynda 31 jeltoqsan - 5 qańtar aralyǵynda orta eseppen 16 órt oqıǵasy tirkeledi. Málimet úshin aıtaıyn, sońǵy 6 jylda qalada 80 órt oqıǵasy boldy. 2020 jyly 13 órt, 2021 jyly 25 órt shyqty», - dedi Aleksandr Raý.
Sondaı-aq, basqarma basshysy pırotehnıkalyq buıymdardyń qaýiptiligi týraly aıtty.
«Pırotehnıkalyq buıymdar órt qaýipti jáne jarylys qaýipti bolyp ekige bólinedi. Pırotehnıkalyq buıymdar turmystyq jáne tehnıkalyq qoldanýǵa arnalady. Al turmystyq qoldaný úshin qaýiptiliktiń birinshi, ekinshi, úshinshi klassyndaǵy buıymdarǵa ǵana ruqsat beriledi. Ol týraly qaptamasynda mindetti túrde kórsetilýi kerek. Sonymen qatar, qaptamada óndirýshiniń eskertýi, ataýy, ornalasqan jeri, buıymǵa sáıkes daıyndalǵan standarty, jaramdylyq merziminiń aıaqtalý kúni, qaýipti faktorlar, qoldaný sharttarynyń shekteýleri, qaýipsiz saqtaý jáne kádege jaratý jónindegi talaptary kórsetiledi, barlyq jazýlar memlekettik jáne orys tilderinde jazylýy tıis. Pırotehnıkalyq buıymdarda sáıkestik sertıfıkaty jáne sáıkestik deklaratsııasy bolýǵa mindetti. Atalǵan qujattardyń qoldanylý merzimi úsh jyldy quraıdy», -dedi ol.
Al pırotehnıkalyq buıymdardy kez kelgen maqsattaǵy ǵımarattarda, úı-jaılarda jáne qurylystarda qoldanýǵa úzildi-kesildi tyıym salynady.
«Jarylys qaýpi bar, órt qaýpi bar obektilerdiń aýmaqtarynda, joǵary voltty elektr berý jelilerinde, shatyrlarda, jabyndarda, balkondarda, lodjalarda jáne ǵımarat qasbetteriniń shyǵyp turǵan bólikterinde, tarıh jáne mádenıet eskertkishterinde, sondaı-aq, pırotehnıkalyq buıymdy onyń qaýipsiz jaǵdaıynyń talaptaryna jaýap bermeıtin aýa raıy jaǵdaıynda, jas shekteýleri boıynsha sáıkes kelmeıtinderge paıdalanýǵa tyıym salynady», - dedi Aleksandr Raý.
Aıta keteıik, saqtyq sharalary men pırotehnıkany paıdalaný erejelerin durys saqtaý densaýlyq pen múlikti saqtaýǵa jáne merekeden jaqsy kóńil-kúı alýǵa kómektesedi.
