Almatyda órtten zardap shekkender tamaq jáne jatyn orynmen qamtamasyz etildi

ALMATY. QazAqparat – Almatyda «Aqkent» shaǵynaýdanyndaǵy 16 qabatty turǵyn úıde oryn alǵan órtke baılanysty Alataý aýdanynyń ákimi Azamat Qaldybekovtiń tóraǵalyǵymen úı aldynda jedel shtab quryldy. Onyń quramyna Tótenshe jaǵdaılar departamenti, polıtsııa, prokýratýra, Ulttyq qaýipsizdik komıteti endi, dep habarlaıdy QazAqparat tilshisi.

Almaty ákimdiginiń málimetinshe, jedel shtab táýlik boıy jumys isteıdi:

- Polıtsııa basqarmasy zardap shekken azamattar múlkiniń qaýipsizdigi men saqtalýyn qamtamasyz etý maqsatynda jergilikti jerde polıtsııa qyzmetkerleriniń kezekshiligin uıymdastyrdy;

- Zardap shekken turǵyndar úshin tamaqtaný jáne túnep shyǵý oryndary uıymdastyryldy (178-shi lıtseıdiń sport zaly men qonaqúı);

- Almaty qalasynyń Qutqarý qyzmeti arqyly 250 orynǵa jınalmaly tósekter men matratstar uıymdastyryldy;

- Aýmaqty sanıtarlyq tazartý boıynsha aýdan qyzmetiniń jumysy uıymdastyryldy;

- Aýdan ákimdigi páterdiń búlingen materıaldaryn (terezeler, esikter jáne basqalar) qalpyna keltirý máselesi boıynsha qurylys salýshymen kelissózder júrgizdi. Onyń nátıjeleri boıynsha qurylys salýshy páterlerdi qalpyna keltirýge mindettendi;

- Turǵyndar arasynda qajetti túsindirý jumystary júrgizilýde;

- Zardap shekkender úshin jedel jeli uıymdastyryldy: 87071872507; 3989820

- Zardap shekkenderge ýaqytsha turatyn oryn usyný úshin jaqyn mańdaǵy qonaqúılermen kelissózder júrgizildi;

«Qazirgi ýaqytta barlyq qyzmetter shtattyq rejımde jumys istep jatyr. Aýdan ákimi A. Qaldybekov pen barlyq múddeli qalalyq jáne aýdandyq qyzmetter oqıǵa ornynda júr. Qazirgi kezde jaǵdaı turaqty»,- dep atap ótti qala ákimdiginen.

Eske sala keteıik, 1 tamyz kúni Almatyda 16 qabatty úı órtendi. Amaly qalmaǵan turǵyndar balalaryn terezeden laqtyrdy.

Qyzyl jalyn saǵat 18:46 kezinde sóndirildi.

Alǵashynda 31 adam, onyń ishinde 16 bala aýrýhanaǵa jetkizilgeni habarlanǵan bolatyn.

Zardap shekkenderdiń arasynda 2 júkti áıel bar.

Keıingi málimet boıynsha, oqıǵa saldarynan 1 adam mert bolyp, 43-i zardap shekti. Onyń ishinde 4 bala reanımatsııa bóliminde jatyr.