Almatyda órtke qarsy arnaıy rejım engizildi
ALMATY. QazAqparat – Almatyda órtke qarsy arnaıy rejım engizildi. Bul týraly Óńirlik kommýnıkatsııalar qyzmetinde ótken brıfıngte qalalyq Tótenshe jaǵdaılar departamenti bastyǵynyń orynbasary Samat Asaınov málim etti, dep habarlaıdy QazAqparat tilshisi.
Samat Asaınovtyń aıtýynsha, Almatyda órttiń qaýipti kezeńi naýryz aıynda bastalyp, ádette qazan aıyna deıin sozylady. Osy ýaqytta TJD quramy kúsheıtilgen tártipte jumys isteıdi. Tabıǵı órttiń aldyn alý boıynsha monıtorıng júrgiziledi.
«Bıyl shilde aıynda aýa raıy qubylmaly boldy. Kún qatty ysydy. Azdap jaýǵan jaýyn-shashynnan aýa temperatýrasy tómendegen joq. Ásirese bul taýly aımaqqa qatysty. Alaıda ýaqtyly qabyldanǵan sharalardyń arqasynda órttiń aldyn aldyq. Órttiń qaýipti kezeńi bastalǵannan beri 193 aǵash órtendi. Bıyl qurǵaq shóptiń janýy 14,3%- ǵa, qurǵaq ósimdikterdiń janýy 55,2%-ǵa azaıdy», – dedi Almaty TJD bastyǵynyń orynbasary.
Buǵan deıin kóktemde jergilikti atqarýshy organdardyń qatysýymen aýqymdy jumys qolǵa alyndy.
Aýdan ákimdikteri jalpy aýdany 153,7 ga qurǵaq shópti tazalaý jumystaryn júrgizdi. Jer jyrtylyp, uzyndyǵy 75,57 shaqyrym mıneraldy jolaqtar jańartyldy.
Sondaı-aq spıker TJD men polıtsııa qyzmetkerlerinen quralǵan mobıldi toptyń jumysyna toqtaldy.
Bul qyzmetke orman sharýashylyǵy mekemeleriniń qyzmetkerleri qol ushyn sozyp, eriktiler de qatysty. Bul toptar órt týyndaýy yqtımal degen «ystyq» aımaqtardy tekseredi.
«Mobıldik toptar 82 birlesken reıd júrgizdi. Demalýshylarǵa túsindirme jumystaryn júrgizdi. Ot tutatqan 235 jaǵdaıǵa tosqaýyl bolyp, 200 jeke tulǵany ákimshilik jaýapqa tartty. Olarǵa jalpy somasy 437 550 teńge aıyppul salyndy», – dedi Samat Asaınov.
Departament ókili jyl saıyn ótkiziletin aldyn alý sharalarynyń arqasynda sońǵy 9 jylda taýly jáne ormandy jerlerde, orman-saıabaq aımaqtarynda órtke jol berilmegenin tilge tıek etti.
«Barlyq qutqarýshylar taýlar men ormandarda qaýipsiz júris-turys mádenıetin saqtaǵandary qýanatady. Tabıǵatta ashyq ottyń jaǵylýyna jol bermeý óte mańyzdy. Qurǵaq shóp pen qoqysty órtemeńiz. Qurǵaq shópti ádeıi órteıtin adamdar, jaqyn aımaqty tazartý úshin qaýip tóndiredi. Mysaly, jeke aýlanyń ıeleri men baǵbandar ystyq kúnnen keýip qalǵan shóp pen qoqysty órtep jiberedi», – dedi ol.
Almaty qalasy TJD bastyǵynyń orynbasary Almaty turǵyndaryna «Qazgıdromettiń» aldyn ala málimetteri boıynsha shilde aıynyń ekinshi jartysynda jáne tamyz aıynda megapolıs aýmaǵynda azdaǵan jaýyn-shashyn, sondaı-aq aýa temperatýrasynyń keı jerlerde 40 gradýsqa deıin kóterilýi kútiletinin aıtty.
«Osy ýaqytta Almaty qalasy ákimdiginiń, «Qazáýequtqarý» jáne «Qazáýeormanqorǵaý» RMQK barlyq qutqarý qyzmetteri jaýyngerlik ázirlikte bolady. Almatyda órtke qarsy arnaıy rejım engizildi»,-dep qosty spıker.
