Almatyda órtenip jatqan úıden 4 adam qutqaryldy
ALMATY. QazAqparat - Almatyda órtenip jatqan úıden 4 adam qutqaryldy, dep habarlaıdy QazAqparat tilshisi.
Almaty qalalyq Tótenshe jaǵdaı departamentiniń málimetinshe, 13 tamyzda túngi saǵat 02: 58-de «101» pýltine Jetisý aýdany, Aqtolqyn kóshesi №12 úıdiń janyp jatqany týraly habarlama kelip tústi.
«TJD kúshteri men quraldary joǵary dárejedegi shaqyrtý boıynsha jiberildi. Belgilengen normatıvtik ýaqyt boıynsha (8 mınýtta) oqıǵa ornyna jetkende, 2-qabatty turǵyn úıdiń jalpy aýdany 300 sharshy metr ashyq jalynmen janyp jatqanyn anyqtaǵan. Órttiń tez taralýyna 1943 jyly salynǵan ǵımarattyń aǵash qurylymy (aǵash qalqalar, aǵash tóbe jabyndylary) yqpal etti. Turǵan úıdiń barlyq qabattarynda qoıý tútinnen evakýatsııa joldary jabylyp, turǵyndardyń ómiri men densaýlyǵyna qaýip tóndi»,- dep habarlady vedomstvanyń baspasóz qyzmeti.
Japsarlas ornalasqan páterlerdi sóndirý jáne qorǵaý úshin dereý órt sóndirý oqpandary berildi. Barlaý jáne órtti sóndirý barysynda órt sóndirýshiler 3 tizelik baspaldaq arqyly 4 adamdy qutqardy. Olar- 52 jastaǵy er adam jáne 10 jasar bala, 36 jáne 55 jastaǵy eki áıel.
56 jastaǵy áıel adam jaraqat aldy. Zardap shekkender dereý qalanyń medıtsınalyq mekemelerine jatqyzyldy, qazir olar dárigerlerdiń baqylaýynda.
Órtti sóndirýge jeke quramnan 43 adam, 12 birlik tehnıka jumyldyryldy.
Órt saǵat 03:54-te aýyzdyqtalyp, tańǵy 04:17-de tolyǵymen joıyldy.
