Almatyda órtengen jıhaz tsehy: Áıel adamnyń ólimine qatysty qylmystyq is qozǵaldy
ALMATY. QazAqparat - Almaty polıtsııasy órtenip ketken jıhaz tsehynda mert bolǵan áıeldiń ólimine qatysty qylmystyq is qozǵady, dep habarlaıdy QazAqparat tilshisi.
Almaty polıtsııa departamentiniń habarlaýynsha, órtengen jıhaz sheberhanasynda óli tabylǵan áıeldiń kim ekeni anyqtaldy. Ol osy tsehta jumys isteıtin 59 jastaǵy áıel bolyp shyqty.
«Bul fakti sotqa deıingi tergep-tekserýdiń biryńǵaı tiziliminde tirkeldi. Bul QR QK 292-babynyń 2-bóligi boıynsha órt qaýipsizdigi talaptaryn buzý. Atalǵan qylmystyq is boıynsha sot-medıtsınalyq saraptama men tıisti saraptamalyq zertteýler taǵaıyndaldy», - dep habarlady Almaty qalalyq PD.
Eske sala ketsek, Jetisý aýdanynyń Ratýshnyı kóshesindegi sheberhana órtendi. Tilsiz jaý tsehtyń 1 200 sharshy metr aýmaǵyn sharpyǵan. Onyń sóndirýge 20 tehnıka men 60 adam jumyldyryldy. Órt sóndirilgen soń jıhaz tsehynan áıel adamnyń denesi tabylǵan bolatyn.
