Almatyda órtengen úıge kúzet qoıyldy
ALMATY. QazAqparat - Almatyda tún ishinde órtke oranǵan úıge kúzet qoıyldy. Bul týraly búgin qalalyq TJD ótkizgen baspasóz máslıhaty barysynda aıtyldy, dep habarlaıdy QazAqparat tilshisi.
Tótenshe jaǵdaı keshe, 12 qyrkúıekte túngi 23:42-te bolǵan edi. Túrksib aýdany Saýranbaev kóshesi boıyndaǵy karkas pen qamystan soǵylǵan 18-úıdiń órtenip jatqany týraly habarlama kelip túsken.
5 mınýt ishinde órt sóndirýshiler jetkenshe úı tolyǵymen tilsiz jaýdyń sharpýynda qaldy.
Jalpy 250 sharshy metr aýmaq órtenip ketti. Órtti sóndirýge 21 adam jumyldyrylyp, 8 tehnıka tartyldy. Úıde eshkim turmaıtynyna baılanysty eshkim japa shekken joq.
Atalǵan oqıǵa boıynsha tergeý materıaldary qalalyq TJD tapsyryldy. Órttiń shyǵý sebepterin anyqtaýǵa 20 kúnnen bastap 3 aı ýaqyt ketýi múmkin. Saraptama da sol ýaqytta daıyn bolady.
Qalalyq TJD baspasóz hatshysy Sandýǵash Baımuhambetovanyń aıtýynsha, órtengen úıdi baqylaýǵa qazir kúzet qoıylǵan.
«Baspana órtengende oqıǵa ornynda kúzetýge órt sóndirý jasaǵy qalady. Óıtkeni, mundaı úılerdiń túgi qalmaı janyp ketýine 30 mınýt jetkilikti. Kúzet ne maqsatpen qoıylady? Óıtkeni, atalǵan úıdiń qasynda basqa da úıler bar. Órt qaıta tutanatyn bolsa, basqa qurylys nysandaryna nuqsan kelmeýi kerek», - dedi Sandýǵash Baımuhambetova.
Foto instagram/kris_p_almaty
