Almatyda órtengen úıde uıyqtap qalǵan qyz bala qutqaryldy
ALMATY. QazAqparat – Almatyda polıtsııa qyzmetkerleri órtengen páterden jasóspirim qyzdy qutqardy, dep habarlaıdy QazAqparat tilshisi.
Qalalyq Polıtsııa departamentiniń habarlaýynsha, departamenttiń Arnaıy jedel áreket etý jasaǵynyń aǵa ınspektory, polıtsııa maıory Baýyrjan Aıazbaev pen polıtsııa kapıtany Serikjan Edrenov órt shyqqan turǵyn úıdiń mańaıyn jaıaý qaraýyldap júrgende shuǵyl habardy estigen.
Oqıǵa ornyna dereý jetken kezde kópqabatty turǵyn úıdiń úshinshi qabatyndaǵy páterden qoıý tútin shyǵyp jatqan. Dálizde páterdiń esigin asha almaı jatqan erli-zaıyptylar ishte qyzynyń qalyp qoıǵanyn aıtqan.
«Kórshiler jedel qyzmet ókilderin shaqyrǵansha áreket etý qajet edi. Polıtsııa qyzmetkerleri esikti baltamen syndyrýǵa májbúr bolǵan. Úıge kirip, uıyqtap jatqan qyzdy alyp shyǵyp, medıtsına qyzmetkerleriniń qolyna tapsyrǵan. Inspektorlar óz mindetterin tamasha atqardy» - dedi Polıtsııa departamentiniń Arnaıy jedel áreket etý jasaǵynyń komandıri Sergeı Afanasenko.
Belgili bolǵandaı, 13 jastaǵy qyz bala mektepten kelgen soń gaz plıtasyna tamaqty jylytýǵa qoıǵan. Sodan soń jatyn bólmesine baryp, qulaqqap kıip uıyqtap ketken.
Foto: www.instagram.com/almaty_police_department
