Almatyda órtengen páterden áıel adamnyń máıiti tabyldy
ALMATY. QazAqparat – Almatyda kópqabatty úıdegi otqa oranǵan páterden bir áıeldiń denesi tabyldy, taǵy bir áıel qutqaryldy, dep habarlaıdy QazAqparat tilshisi.
Qalalyq Tótenshe jaǵdaılar departamentiniń málimetinshe, órt Medeý aýdany «Samal–2» shaǵynaýdanyndaǵy kópqabatty úıden shyqqan.
«Órt týraly habarlama 21 qazanda túngi saǵat 22:50-de tústi. Órt sóndirý brıgadasy oqıǵa ornyna 6 mınýtta jetti. Olar toǵyz qabatty úıdiń jetinshi qabatyndaǵy páterdiń janyp jatqanyn anyqtady. Terezelerden qoıý qara tútin shyǵyp jatty. Bir áıel adamnyń kómekke shaqyrǵan daýsy estildi. Qutqarýshylar joǵary qabattardan adamdardy evakýatsııalady», - dep habarlady Almaty qalasy Tótenshe jaǵdaılar departamenti.
Órt shyqqan páterdiń temir esigin órt sóndirýshiler arnaıy quralmen ashty. Páterden 1976 jyly týǵan áıeldiń denesi tabyldy. 53 jastaǵy ekinshi áıeldi órt sóndirýshiler jetinshi qabattyń terezesinen AL-32 satysy arqyly alyp tústi. Ol birden aýrýhanaǵa jiberildi.
Órtti sóndirýge 24 jeke quram, 8 tehnıka jumyldyryldy.
Qyzyl jalyn 20 sharshy metr aýmaqty sharpyǵan.
