Almatyda órtengen kólik jóndeý ornynan 9 ballon shyǵaryldy
ALMATY. QazAqparat - Almatyda otqa oranǵan kólik jóndeý ornynan órt sóndirýshiler 6 ottegi ballony men 3 gaz ballonyn alyp shyqty, dep habarlaıdy QazAqparat tilshisi.
Qalalyq TJD-nyń baspasóz hatshysy Sandýǵash Baımuhambetovanyń aıtýynsha, Raıymbek dańǵylynda ornalasqan nysannyń ekinshi qabaty órtengen. Naqtylaǵanda, qoımadaǵy qosalqy bólshekter janyp ketti.
Órt sóndirýshiler jalynnyń japsarlas turǵan ǵımarattardy sharpýyna jol bermedi.
«Oqıǵa ornynan 6 ottegi, 3 gaz ballony qaýipsiz jerge shyǵaryldy. Órt 11:31-de tolyq sóndirildi. Qyzyl jalyn 160 sharshy metr aýmaqty jaramsyz etti. Órtten eshkim japa shekken joq», - dedi S.Baımuhambetova.
