Almatyda órtengen 6 qabatty úıdiń shatyry jóndeldi

Osydan týra bir aı buryn Kókjıek shaǵyn aýdanyndaǵy №32 úı órtke oranǵan bolatyn.

Sodan beri ótken 1 aıda úıdiń shatyry túgel qalpyna keltirildi. Aıdyń sońyna deıin jumysshylar úıdiń qasbetin qalpyna keltirmek.

«Jaýyn sýy ótip ketpes úshin aldymen shatyrdy qalpyna keltirýge kiristik. Aldyn ala esepteý boıynsha shatyr men qasbetke 100-108 mln teńge jumsalady. Bul páterdi jóndeýge jumsalatyn aqshadan bólek. Búginde tilsiz jaý jaramsyz etken 8 páterdiń turǵyndary jalǵa alynǵan páterlerde turyp jatyr», - dedi Jetisý aýdany ákiminiń orynbasary Ernat Bazyl.
 

Onyń aıtýynsha, órtke qatysty tehnıkalyq saraptama qorytyndysy shyqqan. Oǵan sáıkes, órttiń elektr symdarynyń qysqa tuıyqtalýynan emes, ashyq jalynnan tutanǵany belgili boldy.

«Aıdyń sońyna deıin múliktik shyǵyn tolyq eseptelip, órtke kináli tulǵalar anyqtalady. Abyroı bolǵanda, turǵyndardyń kópshiligi páterin saqtandyryp úlgergen. Sondyqtan, keltirilgen shyǵyndy saqtandyrý kompanııasy óteýi tıis.», - dedi Ernat Bazyl.
 

Sonymen qatar, úıi órtengen adamdarǵa 50-100 AEK kóleminde kómek beriledi. Múliktik shyǵyn tolyq eseptelgen soń órtengen páterlerdi jóndeý jumystary bastalady.

Turǵyndardyń kópshiligi qara kúıe shalǵan úılerin tazalaýdy bastap ketti.

«Úkimet shatyrymyzdy jaýyp berdi. Biz oǵan deıin qur otyrmaı qyryp, tazalap jınap daıyndap beremiz. Qazir páter jaldap jatyrmyz. Aqshasyn ákimdik tólep jatyr. Órttiń shyǵýyna sebepker bolǵan balalar dep jatyr. Ol balanyń áke-sheshesiniń ózi páter jaldap turady. Olardan ne suraımyz endi?», - dedi Jandos Ábilǵazıev.
 

Eske sala ketsek, 5 sáýirde Kókjıek shaǵyn aýdanynda №32 úıdiń birneshe balkony men mansardy, shatyry otqa oranǵan bolatyn. Tótenshe jaǵdaı bolǵan jerden 300 adam qaýipsiz jerge kóshirildi.
 

Tótenshe jaǵdıdan soń qala ákimi Baýyrjan Baıbek órtengen úıdi qysqa merzim ishinde qalpyna keltirýge tapsyrma bergen edi.