Almatyda «Orteke-2012» halyqaralyq qýyrshaq óneri festıvali bastaldy
ALMATY. 5 qarasha. QazAqparat - Búgin Almatyda Estonııanyń jastar qýyrshaq teatry óz qoıylymdaryn qazaq tilinde qoıady.
Bul shara «Orteke-2012» ІІ Halyqaralyq qýyrshaq óneri festıvali aıasynda júzege asyp otyr.
A. Seleznev atyndaǵy Almaty horeografııa ýchılışesinde ótetin dástúrli óner dodasyna bıyl Qazaqstannyń túkpir-túkpirinen jáne Qytaı, Reseı, Tájikstan, Egıpet, Estonııa sııaqty alys-jaqyn shet elderdiń qýyrshaq teatrlary qatysýda. Oǵan quramynda Qazaqstan men Reseıdiń áıgili óner maıtalmandary bar QR Eńbek sińirgen qaıratkeri Jarqyn Shákerim bastaǵan qazylar alqasy tórelik jasamaq.
«Orteke» - bul halyqtyń úlken toıy. Qaıta jańǵyrǵan uly óner qala ákimdiginiń qoldaýymen «Jibek joly» boıyndaǵy halyqtar dostyǵynyń bir belgisindeı bıyl ekinshi ret túrli ult pen ulysty jınap otyr», - deıdi J. Shákárim. Onyń aıtýynsha, keń baıtaq qazaq jeriniń qaı túkpirinde júrseńiz de ondaǵy tasqa qashalǵan tańbalardyń bárinde ortekeniń sýretin kóre alasyz. Ózine ejelden tanys bul janýardy halqymyz este joq eski zamandarda-aq ónerdiń bir týyndysyna aınaldyryp, ásem áýen sazymen bıletip, san-salaly qýyrshaq óneriniń úlken bir túrine aınaldyrǵan. Túrli sebeptermen ótken ǵasyrda umyt bola bastaǵan án, bı, kúı, jyr men ertekshilik sııaqty túrli ónerdiń basyn bir arnaǵa toǵystyrǵan «Orteke» keıingi kezde qaıta jańǵyryp, halyq ıgiligine qyzmet ete bastady.
