Almatyda Ortalyq mádenı jáne demalys saıabaǵy qalaı túrlendi
ALMATY. QazAqparat - Almaty ákimi Baýyrjan Baıbek qaıta jańarǵan Ortalyq mádenı jáne demalys saıabaǵyn aralap kórdi, dep habarlaıdy QazAqparat tilshisi.
Basqarýshy kompanııa jańa fontan, sporttyq jáne balalar alańdaryn salý úshin óz qarjysy esebinen 1,6 mlrd teńge ınvestıtsııalaǵan.
Ortalyq saıabaq aýmaǵynda jaryq baǵanalary, asfalt, trotýar plıtkalary jańarǵan, navıgatsııa quraldary ornatylyp, jasyl jelek otyrǵyzyldy.
Buryn kólik turaǵy ornalasqan jerde sport alańdary, strıt-vorkaýt, basketbol jáne fýtbol alańdary, rollerdrom men skeıtodrom paıda bolǵan.
Jazǵy sahnanyń shyǵys jaǵynda alma baǵy ınstallıatsııasymen jańa sýburqaq iske qosyldy. Budan bólek, 10 jyl boıy jumys istemeı turǵan eski fontan da qaıta jóndeldi.
Sonymen qatar, memlekettik-jekemenshik prıntsıpi boıynsha 1990-shy jyldary jabylyp qalǵan «Velotrek» qaıta jasalyp jatyr.
Keler jyldan bastap saıabaqta balalardyń jańa qalashyǵyn qurý josparlanǵan.
«Munymen qosa, Medeý aýdanynyń ákimdigi Ortalyq saıabaqqa alyp baratyn Gogol kóshesin abattandyrý jumystaryn júrgizýde. Jóndeý barysynda trotýarlar jańaryp, kóshe jıhazdary qoıylady. Buryn qalanyń tarıhı ortalyǵyn rekonstrýktsııalaý kezinde Qaldaıaqov kóshesinen Jeltoqsan kóshesine deıingi Gogol kóshesiniń bir bóligi jańarǵan edi», - delingen qala ákimdiginiń aqparatynda.
Aıta keterligi, jalpy Almatyda bıyl 524 kóshe jóndelip, 1400 eski aýla jańardy. 300 km aryq salynyp, 800 km ınjenerlik jeli tartyldy.
Qaladaǵy barlyq jerasty ótpe joldary jańardy.
Jyl aıaǵyna deıin barlyq kóshe jaryqtarynyń úshten biri jaryq dıodty jáne energııa jınaqtaýshy shamdarǵa aýystyrylady, al jańarǵan qoǵamdyq kóliktiń úlesi 87% jetedi.
