Almatyda Ortalyq Azııadaǵy geoaqparat ǵylymyn damytýǵa arnalǵan halyqaralyq konferentsııa bastaldy
ALMATY. 2 mamyr. QazAqparat - Ortalyq Azııada geoaqparat pán retinde oqylǵanymen arnaıy mamandar ázirlenip jatqan joq.
Bul týraly búgin Almatyda óz jumysyn bastaǵan «Ózara baılanysty aýmaqtar: qaýymdastyq, ekonomıka jáne qorshaǵan orta» degen taqyryptaǵy Ortalyq Azııadaǵy VII GISKA halyqaralyq konferentsııasynda aıtyldy.
«Geoaqparat ǵylymynyń damýyna arnalǵan bul shara Qazaqstanda bıyl ekinshi ret ótip otyr. Buǵan deıin ol QazUÝ shańyraǵynda 2011 jyly uıymdastyrylatyn bolatyn. Jyl saıyn ótetin konferentsııanyń bul jolǵy uıymdastyrýshysy Avstrııa-Ortalyq Azııa Geoaqparat ǵylymı ortalyǵy (ACA*GIScience), ál-Farabı atyndaǵy Qazaq ulttyq ýnıversıteti men Avstrııanyń Zaltsbýrg ýnıversıtetiniń «Geoaqparat» kafedrasy», - deıdi QazUÝ-dyń Geografııa fakýltetiniń Kartografııa jáne geoaqparat kafedrasynyń dotsenti Nurjan Kerimbaı.
HHІ ǵasyrdaǵy ınnovatsııalyq bilimderdiń biri sanalatyn geoaqparat geografııany, matematıkany, aqparattyq jáne ǵaryshtyq tehnologııalardy biriktiredi. Bastapqyda tek áskerı salada ǵana paıdalanylyp kelgen bolatyn. «Qyrǵı qabaq soǵys» aıaqtalǵan soń qorshaǵan ortanyń kókeıkesti máselelerin sheshýge bet burdy. Qazaqstanda ol 1993 jyldan bastap ál-Farabı atyndaǵy ulttyq ýnıversıtette pán retinde oqytyla bastady.
«Qazir geografııa mamandyǵynyń ishinde geoaqparatqa mamandaný bastaldy. Ol 10-nan astam joǵary oqý ornynda geografııa jáne kartografııa mamandyqtarynda oqytylýda. Degenmen áli elimizdiń birde-bir oqý ornynda geoaqparat boıynsha arnaıy mamandar ázirlenip jatqan joq», - deıdi N.Kerimbaı.
