Almatyda Ortalyq Azııada ınternet salasyn damytýǵa arnalǵan halyqaralyq forým ótti
ALMATY. Sáýirdiń 30-y. QazAqparat /Erlik Erjanuly/ - Búgin Almatyda "Ortalyq Azııada ınternet salasyn damytý InternetCA-2010" forýmy óz jumysyn aıaqtady,
dep habarlaıdy QazAqparat.
Ony MediaNet halyqaralyq jýrnalıstıka ortalyǵy, Konrad Adenaýer atyndaǵy qor men Astanadaǵy EQYU ortalyǵynyń qoldaýymen Qazaqstanyń medıalyq qaýymdastyǵymen birlesip uıymdastyrdy. Eki kúndik bul sharaǵa memlekettik organdar men úkimettik emes uıymdardan ókilder, Parlament depýtattary, dıplomattar, ınternet-qoǵamdastyqtarynyń belsendileri, jýrnalıster jáne ınternet-sarapshylary qatysty. Onda talqylanǵan negizgi taqyryptar mynaý boldy. "Ortalyq Azııadaǵy ınternet. Negizgi aǵymdar, máseleler, sheshý joldary", "Aımaqtaǵy ınternet salasynyń bolashaǵy", "Internet salasyndaǵy zańdardy damytý", "Internet bıznes retinde. Aımaqtaǵy ınternettiń ınvestıtsııalyq tartymdylyǵy", "Internet-qyzmetter: memlekettik jáne qoǵamdyq", "Ortalyq Azııada ınternetti ulttyq tilderde damytý".
"Bolashaqta dástúrli túrde jyl saıyn ótedi dep josparlanyp otyrǵan bul sharaǵa bıyl Belarýs, Qazaqstan, Qyrǵyzstan, Lıtva,Ózbekstan jáne Tájikstan elinen 100-den astam ókil jınaldy. Onda Ortalyq Azııa elderiniń ınternet naryǵyndaǵy jalpy ahýal ǵana emes Belarýs pen Lıtva memleketteriniń tájirıbesi de jan-jaqty sóz boldy. Aldaǵy ýaqytta forýmda jasalǵan baıandamalar jınaq bolyp basylyp, quzyrly organdardyń nazaryna usynylatyn bolady", deıdi MediaNet halyqaralyq jýrnalıstıka ortalyǵynyń úılestirýshisi Dinmuhamed Zııadın.
