Almatyda Ortalyq Azııa jastary qaýipsizdik sharalaryn talqylaýda
ALMATY. Maýsymnyń 22-si. QazAqparat /Erbol Turymbetov/ - Búgin Almatyda «Ortalyq Azııadaǵy zamanaýı qaýipsizdik sharalary» degen taqyrypta Ortalyq Azııa jastarynyń konferentsııasy bolyp jatyr,
dep habarlaıdy QazAqparat.
Ony Eýropadaǵy qaýipsizdik pen yntymaqtastyq uıymynyń Astanadaǵy ortalyǵy Ortalyq Azııadaǵy aımaqtyq ókildikteriniń qoldaýymen uıymdastyryp otyr. Bul basqosýdyń basty maqsaty - aımaqtaǵy memleketterdiń qaýipsizdik sharalaryna umtylystaryn oıatý. Otyrysqa Qazaqstan, Ózbekstan, Qyrǵyzstan, Tájikstan jáne Túrkmenstan memleketterinen jalpy sany 38 stýdent qatysýda.
«EQYU búgingi Ortalyq Azııa memleketterinde bolyp jatqan saıası ahýaldarǵa beı-jaı qaraı almaıdy. Sol sebepti de bul máselede búgingideı sharalardyń ótkizilýin qajettilik dep sanaımyn. Onda stýdentter aımaqtaǵy qaýipsizdik máselelerine qatysty ózekti degen 10 taqyrypty tańdap, sol boıynsha joba jasaıdy. Úzdik dep tanylǵany BAQ-da jarııalanatyn bolady», deıdi EQYU-nyń Qazaqstandaǵy elshisi Aleksandr Kelchevskıı.
Ortalyq Azııa stýdentteriniń bul basqosýy 2004 jyly Ózbekstannyń Sharbaq qalasynda bastalǵan bolatyn. Odan keıin ol Ystyqkólde, Dýshanbede jalǵasty.
