Almatyda «Orta mektep pen joǵary oqý oryndaryndaǵy matematıka kýrsy mazmunynyń sabaqtastyǵy máseleleri» taqyrybynda respýblıkalyq semınar ótedi

Bul sharany Qazaqstan Respýblıkasynyń Bilim jáne ǵylym mınıstrligi Qazaqstan matematıka páni muǵalimderiniń І sezi usynymdaryn iske asyrý josparyna sáıkes uıymdastyryp otyr, dep habarlady mınıstrliktiń baspasóz qyzmeti.

Semınardyń maqsaty - respýblıkanyń mektepteri men joǵary oqý oryndaryndaǵy matematıkalyq bilim sapasyn arttyrý.

Semınar jumysynyń barysynda mektep jáne joǵary oqý oryndaryndaǵy algebra jáne analız bastamalary men geometrııa kýrstary mazmunynyń sabaqtastyǵyn oqý-ádistemelik qamtamasyz etý máseleleri talqylanady. Sondaı-aq, semınar aıasynda oqý baǵdarlamalary men oqýlyqtardy daıyndaýshylardyń matematıka termınderin túrli nusqada paıdalanýynyń aldyn alý maqsatynda mektep pen joǵary oqý oryndary deńgeılerinde qoldanýǵa arnalǵan qazaq tilinde biryńǵaı matematıkalyq termınologııany qalyptastyrý qajettiligi týraly máselelerdiń qarastyrylýy kózdelip otyr.

Semınardyń sektsııalyq jumystarynda qatysýshylar 11 jyldyq mekteptiń memlekettik jalpyǵa mindetti bilim berý standartyn jáne «Matematıka» mamandyǵy boıynsha joǵary bilim berý deńgeıiniń standartyn taldaıdy.

Sonymen qatar, muǵalimderdi «Matematıka jáne ınformatıka», «Matematıka jáne fızıka» jáne t.b. qos mamandyq boıynsha daıarlaý máseleleri, ıaǵnı mektep pánderiniń mazmunyn kiriktirý jaǵdaıynda matematıka pániniń muǵalimderin daıarlaý joldary naqtylanady.

Semınar jumysyna joǵary oqý oryndarynyń ókilderi, respýblıkanyń JOO men ǵylymı-zertteý ınstıtýttarynyń ǵalym ádiskerleri, jalpy orta bilim beretin jáne arnaıy mamandandyrylǵan mektepterdiń basshylary men matematıka pániniń muǵalimderi, pedagog kadrlardyń biliktiligin arttyrý ınstıtýttarynyń ádiskerleri qatysady.