Almatyda orta mektep pen joǵary oqý oryndaryndaǵy matematıka kýrsy mazmuny týraly respýblıkalyq semınar ótip jatyr
ALMATY. 28 qarasha. QazAqparat /Erlik Erjanuly/ - Búgin Almatyda «Orta mektep pen joǵary oqý oryndaryndaǵy matematıka kýrsy mazmunynyń sabaqtastyǵy máseleleri» dep atalatyn respýblıkalyq semınar bastaldy.
Eki kúndik bul sharany QR Bilim jáne ǵylym mınıstrligi Qazaqstannyń matematıka páni muǵalimderiniń І seziniń usynymdaryn iske asyrý josparyna sáıkes Abaı atyndaǵy Qazaq ulttyq pedagogıkalyq ýnıversıtetiniń bazasynda ótkizýde. Semınardyń basty maqsaty - respýblıkanyń mektepteri men joǵary oqý oryndaryndaǵy matematıkalyq bilim sapasyn arttyrý. Oǵan joǵary oqý oryndarynyń ókilderi, respýblıkanyń joǵary oqý oryndary men ǵylymı-zertteý ınstıtýttarynyń ǵalym ádiskerleri, jalpy orta bilim beretin jáne arnaıy mamandandyrylǵan mektepterdiń basshylary men matematıka pániniń muǵalimderi, pedagog kadrlardyń biliktiligin arttyrý ınstıtýttarynyń ádiskerleri qatysýda.
" Semınarda olar mektep jáne joǵary oqý oryndaryndaǵy algebra jáne analız bastamalary men geometrııa kýrstary mazmunynyń sabaqtastyǵyn oqý-ádistemelik qamtamasyz etý máselelerin talqylaıdy. Sondaı-aq oqý baǵdarlamalary men oqýlyqtardy daıyndaýshylardyń matematıka termınderin túrli nusqada paıdalanýynyń aldyn alý maqsatynda mektep pen joǵary oqý oryndary deńgeılerinde qoldanýǵa arnalǵan qazaq tilinde biryńǵaı matematıkalyq termınologııany qalyptastyrý qajettiligi týraly máselelerdi qarastyrady", - deıdi Abaı atyndaǵy QazUPÝ-niń Aqparat jáne baspa ortalyǵynyń redaktory Álııa Asmaǵulova. Onyń aıtýynsha, sınardyń sektsııalyq jumystarynda qatysýshylar 11 jyldyq mekteptiń memlekettik jalpyǵa mindetti bilim berý standartyn jáne «Matematıka» mamandyǵy boıynsha joǵary bilim berý deńgeıiniń standartyn taldaıdy. Sonymen qatar, muǵalimderdi «Matematıka jáne ınformatıka», «Matematıka jáne fızıka» jáne taǵy basqa da qos mamandyqtar boıynsha daıarlaý máseleleri, ıaǵnı mektep pánderiniń mazmunyn kiriktirý jaǵdaıynda matematıka pániniń muǵalimderin daıarlaý joldary naqtylanady.
