Almatyda orta bilimdi medıtsına qyzmetkerleriniń respýblıkalyq konkýrsy ótip jatyr
ALMATY. Mamyrdyń 11-i. QazAqparat /Erbol Azanbek/ - Búgin Almatydaǵy qalalyq medıtsına kolledjinde «Medıtsınalyq jáne farmatseptıkalyq orta bilimdi eń úzdik maman» respýblıkalyq konkýrsy bastaldy,
dep habarlaıdy QazAqparat .
Konkýrs 2 kezeńnen turady. Birinshisinde saıyskerler kompıýterlik testleýden ótse, ekinshi kezeńde alǵashqy medıtsınalyq kómek kórsetýdiń túrlerinen saıysqa túsedi. Erteń márege jetetin konkýrsqa Pavlodar, Petropavl, Aqtóbe, Qyzylorda, Shymkent, Almaty, Astana, Atyraý, Qaraǵandy, Qostanaı, Oral, Jambyl, Kókshetaý, Mańǵystaý, Óskemen qalalarynan medbıkeler, feldsherler men akýsherler qatysýda.
Uıymdastyrýshylardyń aıtýynsha, konkýrs 11-12 mamyr kúnderi ótetin orta sanatty medıtsına qyzmetkerleriniń II-shi sezi men halyqaralyq medbıke kúnine oraılastyrylyp ótkizilip otyr. Atalǵan sezd aıasynda bunymen qatar Dańq memorıalyna gúl shoǵyn qoıý, aǵash otyrǵyzý, "Densaýlyq jármeńkesi", "Densaýlyq tramvaıy" syndy sharalar ótkiziledi. Sezde negizinen orta bilimdi medıtsına qyzmetkerlerin áleýmettik qorǵaý, ınnovatsııalyq tehnologııalardy engizý, bilim jetildirý syndy máseleler talqylanady.
