Almatyda orta bilim berýdiń 12 jyldyq úlgisin engizý tájirıbesindegi problemalar talqylandy
ALMATY. 24 naýryz. QazAqparat /Názıra Eleýhan/ - Búgin Almatyda «Orta bilim berýdiń 12 jyldyq úlgisin engizý tájirıbesi men problemalary» degen taqyryppen «dóńgelek ústel» otyrysy bolyp ótti.
Halyqaralyq Bıznes akademııasynda ótken shara atalmysh oqý orynnyń «Aýyl mektepterin elimizdiń JOO-lary arqyly qoldaý» baǵdarlamasy aıasynda uıymdastyryldy. Oǵan memlekettik jáne jekemenshik mektepterdiń basshylary qatysty. Jıynda dóńgelek ústelge qatysýshylar orta bilim berýdiń 12 jyldyq úlgisin engizý tájirıbesindegi problemalardy talqylady.
Esterińizge sala ketsek, keıbir mektepterdiń 12 jyldyq úlgige kóshý eksperımenti 2003 jyly bastalǵan bolatyn. Al 2015 jyldan bastap respýblıkadaǵy barlyq mektepterge 12 jyldyq mektep oqýy engizilmek. Bul reforma qazaqstandyq bilim júıesiniń halyqaralyq standarttarǵa kóshýine baılanysty júrgizilýde. Álemniń kóptegen elderindegi balalar 12 jyldyq mektepte bilim alýda.
Dóńgelek ústelge qatysýshylardyń ortaq pikiri boıynsha, 12 jyldyq úlgige kóshý bilim reformasynyń basty maqsaty emes. Olardyń aıtýynsha, basty maqsat - mektepte kásiptik baǵdarlaýdy kúsheıtý, JOO-da keshegi mektep oqýshylaryn 1 kýrsta qajetti deńgeıge jetkizýdegi máselelerdi sheshý bolýy kerek. Olardyń pikirinshe, odan keıin ǵana halyqaralyq standarttarǵa saı bilim júıesine kóshý qajet.
" Sońǵy kezde birde bir bitirýshi jumysshynyń mamandyǵyn tańdap alǵan joq. Óıtkeni, aýyldy jerlerde 9-shy synyptan keıin jastardyń bir nársemen aınalysýǵa, maman ıesi bolýyna múmkindik beretin esh júıe joq. Oǵan kóp ata-ananyń balasyna joǵary bilimdi bergenin qalaıtynyn qosyńyz. Búginde elimizdiń barlyq jastarynda joǵary bilim dıplomdary bar, ol árıne jaqsy, biraq menińshe, bul jaǵdaıdy júıeli túrde ózgertý kerek, máselen, orta mektepterde 7-8 synyptan bastap, kásiptik baǵdarlaýdy engizý qajet, sonymen qatar, jumysshy mamandyqtarynyń bedelin kóterý kerek, orta jáne kishi bıznes oryndarymen baılanys ornatý kerek",-dedi Lobanovsk orta mektebiniń oqý isi jónindegi meńgerýshisi Kúltaı Júkisheva.
№2-shi Saýmalkól aýyl mektebiniń oqý isi jónindegi meńgerýshisi Jibek Janqarashevanyń aıtýynsha, aýyldy jerlerde materıaldyq-tehnıkalyq máselelerden basqa, pedagogtardyń kvalıfıkatsııasyn kóterý máseleleri bar.
"Bizde kóptegen pán boıynsha muǵalimder jetispeıdi. 12 jyldyqqa kóshken jaǵdaıda ustazdarǵa qoıylatyn talaptardy eskersek, qazirden bul máseleni sheship, bilikti kadrlar daıyndaýymyz qajet",-dep atap ótti ol.
