Almatyda órt sóndirýshilerge kómektesken oqýshylar marapattaldy
ALMATY. QazAqparat - Almaty qalasy boıynsha Tótenshe jaǵdaılar departamenti qyzmetkerleri turǵyn úıler men saıajaılardy órtten qorǵap qalǵan 4 oqýshyǵa alǵys aıtyp, arnaıy syılyq tabys etti, dep habarlaıdy QazAqparat tilshisi vedomstvonyń baspasóz qyzmetine silteme jasaı otyryp.
TJD-nyń baspasóz qyzmetiniń habarlaýynsha, Medeý aýdanynda kúrdeli aýmaqta bolǵan órtti sóndirýge kómektesken oqýshylardy marapattaý QR Tuńǵysh Prezıdenti kúnin merekeleý qarsańynda arnaıy uıymdastyrylǵan. Marapattaý rásimine balalardyń analary da qatysty.
Atap aıtqanda, Almaty qalasyndaǵy № 99, № 64, № 29 mektepteriniń oqýshylary Danııl Semenov, Kırıll Semenov, Evgenıı Samoılov jáne Kondrat Mıl QR ІІM Tótenshe jaǵdaılar komıtetiniń alǵys hatymen marapattaldy. Sondaı-aq, departament atynan olarǵa televızor syılyqqa tartý etildi.
«Balalardyń áreketi otandy súıýdiń naǵyz úlgisi. Balalar adamgershilik tanytty. Olar órtti sóndirýge der kezinde kómek kórsetti», - dedi saltanatty jıynda Almaty qalasy boıynsha TJD basshysy órtke qarsy qyzmet general-maıory Serik Áýbákirov.
TJD baspasóz qyzmetiniń aıtýynsha, balalar 1 qarasha kúni taý bókterinde bolǵan órtti sóndirýge kómektesip, tilsiz jaýdyń turǵyn úıler men saıajaılarǵa jaıylyp ketýinen qorǵap qalǵan.
«Sol kúni TJD órt sóndirýshileri kúrdeli aýmaqtaǵy órtti sóndirdi. Taý betkeıindegi júrip turýy qıyn jerde qýraǵan aǵashtar órtke orana bastaǵan. Tik jartastar men tar joldar órt sóndirý mashınalarynyń kóterilýine múmkindik bermedi. Qaýlap janǵan órt tez jaıylyp, turǵyn úıler men saıajaılarǵa tııýi múmkin edi. Órtke qarsy qyzmet jaýyngerleri órtti qolymen, shelektep sóndirip jatqan kezde kútpegen jerden balalar paıda bolyp, bir-bir shelekpen bolysa bastaǵan. Qosymsha jumys kúshiniń kómegine órt sóndirýshiler óte muqtaj edi. Balalar dál ýaqytynda kelip, úlken erlik jasady», - dedi baspasóz qyzmetindegiler.
