Almatyda órt sóndirýshi ózin-ózi óltirmek bolǵan adamdy qutqaryp qaldy
ALMATY. QazAqparat - Almatyda órt sóndirýshi qyzmetker ózin-ózi óltirmek bolǵan er azamatty qutqaryp qaldy. Bul týraly búgin Almaty qalalyq TJD resmı ókili Sandýǵash Baımauhanbetova habarlady.
«Taıaý kúni Almaty qalalyq TJD bastyǵynyń atyna «Versal» turǵyn úı kesheni ákimshiliginen alǵys hat kelip tústi. Onda hat avtory osy turǵyn úı kesheniniń resepshn-operatory mamandandyrylǵan №8-shi órt sóndirý bóliminiń órt sóndirýshi qyzmetkerleriniń ózin-ózi óltirmek bolǵan adamdy qutqaryp qalǵandary úshin olarǵa óz atynan jáne turǵyn úı kesheni ákimshiligi atynan rızashylyǵyn bildirgen», - dedi S. Baımuhanbetova.
Hat avtorynyń aıtýynsha, turǵyn úı keshenindegi bir turǵyn 4-shi qabattyń balkonynan sekirip, ózin-ózi óltirmek bolǵan. Sol sebepten turǵyn úı kesheniniń qyzmetkerleri shuǵyl Almaty qalalyq TJD «101» kezekshi bólimine habarlasyp, kómek suraǵan.
«Eń bastysy, jas jigit aman qaldy. Sol úshin ony qutqaryp qalǵan azamattarǵa shyn júrekten alǵysymyzdy bildiremiz», - delingen hatta.
Aıta ketelik, 29 mamyrda 13 saǵat 4 mınýtta «101» kezekshi bólimine Almaty qalasynyń Medeý aýdany, Shevchenko kóshesi 7 mekenjaıynda bir adamnyń ózi-ózi óltirýge áreket jasap jatqany týraly habar kelip túsken. Bes mınýttan keıin oqıǵa ornyna órt sóndirýshiler mingen avtosaty kelip jetti.
«Oqıǵa ornynda órt sóndirýshiler er azamattyń balkon jaqtaýynan asyp, sekirmekke umtylyp jatqanyn kóredi. Mamandandyrylǵan №8-shi órt sóndirý bóliminiń aǵa ınjeneri, azamattyq qorǵanys leıtenanty Nurbol Ótegenov sol arada órt sóndirý satysymen jyldam kóterilip, ózin-ózi óltirýshi bir qolyn jiberip, kóshe jaqqa burylyp endi sekireıin dep jatqan sátte ony qolynan ustap úlgerip, kóterip balkonnyń ishine qaraı ıterip jiberedi. Keıin, ony myqtap ustaǵan kúıi páterdiń ishki esigin ashyp, basqa da ózara árekettestik kúshi qyzmetkerlerin ishke jiberedi», - dedi S. Baımuhanbetova.
