Almatyda órt sóndirý mototsıklderi paıda bolady
ASTANA. QazAqparat - Almaty qalasynyń kóshelerinde órt sóndirý mototsıklderi paıda bolady, dep habarlaıdy Almaty qalalyq TJD-nyń baspasóz qyzmeti.
Qazirgi ýaqytta qalada 15 órt sóndirý bólimderi qyzmet etedi, tıesili normalaryna sáıkes olardyń qyzmet kórsetý radıýsy 3 shaqyrym dep belgilengen. Qazir qalada jedel qımyldaý normatıvtiniń ýaqytyna saı bolýy úshin taǵy da 15 órt sóndirý bólimi jetispeıdi.
Kólik keptelisteri de órt sóndirýshilerdiń oqıǵa ornyna der kezinde jetýine qıyndyq týdyrýda. Jedel den qoıýdyń ortasha ýaqyty 13 mınýt, keıbir jaǵdaılarda órt sóndirýshiler 20 mınýtta keledi.
Osy problemany órt sóndirý qyzmetteriniń bólimshelerin ornalastyra otyryp, jańa órt sóndirý depolaryn salý jolymen sheshý kerek ekeni sózsiz. Sonymen qatar, TJD halyqaralyq tájirıbeni zerdeleı otyryp, bólimshelerdiń kelý ýaqytyn qysqartýdyń shyǵyny az balamaly ádisterin qarastyrdy.
«Almaty-2020» damytý baǵdarlamasynyń jeti basymdyqtarynyń biri - «Qaýipsiz qala». Ákimdik avarııalyq-qutqarý tehnıkasyn jáne jabdyqty, sondaı-aq halyqty qulaqtandyrý quraldaryn satyp alýǵa turaqty negizde qarjylyq qarajat bólýde.
Almaty qalasynyń ákimi Baýyrjan Baıbektiń qoldaýymen Almaty qalasynyń Tótenshe jaǵdaılar departamenti jyldam den qoıýdyń mototsıklet ekıpajy jobasyn endirdi.
Qala kóshelerindegi keptelister kezinde órt sóndirý tásilderiniń biri - órt sóndirý mototsıklderin paıdalaný. Órt sóndirý mototsıklderi Reseı, BAÁ, Qytaı, Grekııa, Germanııa ján Túrkııada sátti qoldanylýda. Qarqyndy jol qozǵalysy jaǵdaılarynda jedel den qoıýdyń osyndaı oń tájirıbesi týraly qala ákimine baıandaldy. Osy usynysty qala basshylyǵy qoldap, aǵymdaǵy jyly 4 órt sóndirý mototsıklderin satyp alýǵa qarajat bólindi. Jańalyq Qazaqstanda alǵash ret qoldanylyp otyrǵanyn atap ótý qajet.
Almaty qalasy TJD arnaıy tapsyrysy boıynsha jasalǵan «ıAVA-660» órt sóndirý-qutqarý mototsıklderi órt sóndirgish zatty joǵary jyldamdyqta beretin arqaǵa ilinetin ımpýlsti órt sóndirý júıesimen jabdyqtalǵan, sondaı-aq suıyqty órt sóndirgish, dárigerge deıingi medıtsınalyq kómek kórsetý úshin «feldsherlik» buıymdar men quraldar jıyntyǵy, kesýge jáne ashýǵa arnalǵan aralas avarııalyq-qutqarý quraldary bar.
Olardyń mindeti - oqıǵa ornyna (onyń ishinde JKO) jedel jetý, Almaty qalasy TJD negizgi kúshteri kelgenge deıin órtti oqshaýlaý.
Búgingi kúni 18 órt sóndirýshi maman ekstremaldy júrgizý boıynsha daıarlyqtan ótip, sertıfıkat aldy.
Órt sóndirý-qutqarý mototsıklderin endirýdiń tıimdiligin almatylyq qutqarýshylar jaýyngerlik kezekshilikterde qoldaný shamasy boıynsha baǵalaı alady dep josparlanyp otyr.
