Almatyda órt shyqqan úıdiń 30 turǵyny qaýipsiz jerge kóshirildi
ALMATY. QazAqparat- Almatyda kópqabatty turǵyn úıdiń páterinen shyqqan órt sóndirildi. Bul týraly QazAqparat tilshisine qalalyq tótenshe jaǵdaılar departamentiniń baspasóz qyzmetiniń ókili Aınur Dúısen málim etti.
«Búgin tańǵy saǵat 09:45-te «101» kezekshi pýltine Dostyq dańǵyly men Bógenbaı kóshesiniń qıylysynda ornalasqan nómiri №36-shy kópqabatty turǵyn úıdiń tórtinshi qabatynda ornalasqan páterden órt shyqqandyǵy týraly shuǵyl habar kelip tústi. Órt sóndirýshiler oqıǵa ornyna 9 saǵat 50 mınýtta kelip jetti. Tilsiz jaýdy aýyzdyqtaýǵa 4 negizgi tehnıka men 4 arnaıy tehnıka jumyldyryldy», -dedi A. Dúısen.
Onyń aıtýynsha,órt 10 saǵat 11 mınýtta tolyǵymen sóndirildi. Jalyn tili 18 sharshy metrdi sharpydy. Qazir onyń shyǵý sebepteri anyqtalý ústinde.
«30 adam qaýipsiz jerge shyǵaryldy. Olardyń ishinde ústińgi qabatta turatyn bes jasar balasy bar áıel de bar», - dedi A. Dúısen.
