Almatyda órt shalǵan 12 páterdiń jóndeý jumystary aıaqtaldy
ALMATY. 4 qarasha. QazAqparat /Erbol Turymbetov/ - Keshe Almaty qalasy Túrksib aýdanyna qarasty «Juldyz-2» shaǵyn aýdanynda páterlerin órt shalǵan turǵyndar jóndeýden ótken úılerine qaıta qonystandy.
Ústimizdegi jyldyń 25 tamyz kúni atalmysh yqsham aýdanda ornalasqan №44, №45 úılerdiń ústińgi qabattaryn órt shalǵan edi. Nátıjesinde, túgeldeı janyp ketken 12 páter tolyqtaı jóndeýge jiberilgen bolatyn. Sodan beri 2 aı ýaqyt ishinde zardap shekken turǵyndarǵa túrli kómekter kórsetildi. Kúndelikti tamaq pen ýaqytsha ornalastyrý máselelelerin qala jáne Túrksib aýdanynyń ákimdigi qolǵa aldy.
«Biz mundaǵy jaǵdaıdyń óte aýyr bolǵanyn túsinip, birden turǵyndardyń jaǵdaıyn oıladyq. Eń birinshi kezekte kerekti nárselerdi jetkizdik. Biz páterlerdi budan buryn-aq tabys etemiz dep josparlaǵanbyz. Alaıda, qurylys barysy belgili sebepterge baılanysty sál keıinge shegerildi»,- dedi Túrksib aýdany ákiminiń orynbasary Tańat Aıdarbekov.
Jóndeý jumystaryn júrgizgen «Komsnabstroı» JShS qurylys kompanııasy barlyq jumysqa 60 mln. teńge jumsalǵanyn málimdedi. Qurylystyń keıinge shegerilýin olar úı shatyrynyń jańasha órnekte salynýymen túsindirdi. Sondaı-aq, turǵyndar úılerine qonystanysymen tabıǵı gaz da paıdalanylýǵa beriledi dep kútilýde.
