Almatyda órt kezinde jas áıel men jańa týǵan náreste qurban boldy
ASTANA. 26 qazan. QazAqparat - Almatyda keshe kúnniń ekinshi jartysynda jekemenshik úıde 10 sharshy metr jer órtendi, dep habarlady QR TJM.
Tilsiz jaýdy órtke qarsy qyzmet mamandary kelgenshe jergilikti turǵyndar toqtatqan.
Oqıǵa ornynda 23 jastaǵy áıel men jańa týǵan náreste jan tapsyrdy. Túrli deńgeıdegi kúıikpen 6 jasar bala aýrýhanaǵa jatqyzyldy. Oqıǵa ornyna QR TJM Almaty qalasynyń TJD órt sóndirý qyzmetiniń 3 tehnıkasy men jeke quramnyń 15 adamy shyqty.
Sonymen qatar, Óskemende 5 qabatty úıdiń úshinshi qabatyndaǵy páterden órt shyqty. Jalyn 40 mınýttan keıin aýyzdyqtaldy. Órtti aýyzdyqtaýǵa QR TJM Shyǵys Qazaqstan oblysynyń TJD órt sóndirý qyzmetiniń 2 tehnıkasy men jeke quramnyń 10 adamy jumyldyryldy. Oqıǵa ornynan 76 jastaǵy er adamnyń múrdesi tabyldy.
Qostanaı oblysynyń Terentevka aýylynda jekemenshik úıde órt boldy. Tilsiz jaý eki saǵattan keıin sóndirildi. Oǵan QR TJM Qostanaı oblysy TJD órt sóndirý qyzmetiniń 2 tehnıkasy men jeke quramnyń 5 adamy jumyldyryldy. Oqıǵa ornynan 83 jastaǵy er adamnyń máıiti tabyldy.
Ekibastuzda saıajaı úıinde gaz ballonynyń jarylýynan órt shyqty. Tilsiz jaý 2,5 saǵattan keıin toqtatyldy. Ony aýyzdyqtaýǵa QR TJM Pavlodar oblysy TJD órt sóndirý qyzmetiniń 2 tehnıkasy men jeke quramnyń 5 mamany qatysty. 18 sharshy metr jer otqa orandy. Oqıǵa ornynan 58 jastaǵy er adamnyń denesi tabyldy.
