Almatyda órt qaýipsizdigin saqtamaǵandarǵa aıyppul salyndy – TJD
Spıkerdiń sózinshe, kún jylynǵaly Almatyda qýraǵan qurǵaq shóptiń órtený oqıǵalary jıilegen. Bıylǵy jyldyń naýryz aıynan beri jalpy aýmaǵy 6,7 gektardy qamtyǵan 65 órt boldy. Ótken táýliktiń ózinde Almaty órt sóndirýshileri 19 shaqyrtý boıynsha shyqqan, onyń segizinde órt qýraǵan shóptiń tutanýynan boldy.
«Órt oqıǵalary kóbinese Alataý, Bostandyq, Medeý, Túrksib aýdandarynda bolady. Órttiń shyǵý sebepteri azamattardyń otqa nemquraıly qaraýynan, sonymen birge ótken jyldyń kúzinen qalǵan qurǵaq ósimdikter shabylmaýy saldarynan bolyp otyr»,- deıdi Rýslan Qasybaev.
Sonymen qatar, ol osy kóktemde jáne jazda taýly-ormandy jerlerde TJD, Polıtsııa departamentiniń jergilikti polıtsııa qyzmeti qyzmetkerlerimen, sondaı-aq volonterlik uıymdardyń qatysýymen birlesken patrýldeý ótkizý josparlanǵanyn aıtty. Mundaı tájirıbe ótken 2020 jyly da qoldanylǵan.
«Osyndaı patrýldeýdiń arqasynda 116 ot jaǵýdyń joly kesildi, 41 adam ákimshilik jaýapkershilikke tartyldy, jalpy somasy 416 700 teńge aıyppul salyndy. Qazirgi ýaqytta jergilikti atqarýshy organdarmen birlesip, jalpy aýdany 122 gektar bolatyn qurǵaq ósimdikterdi shabý boıynsha jumystar júrgizilýi qajet ýchaskeler anyqtaldy»,- dedi ol.
Qalada tabıǵı órtti sóndirýge jedel den qoıý maqsatynda TJD men qalanyń azamattyq qorǵaý qyzmetterinde 200-den astam adamnan turatyn shuǵyl is-qımyl jasaǵy qurylǵan. Olar ótimdiligi joǵary tehnıkamen, aspaly órt sóndirgishtermen, saqpandarmen jáne kúrektermen jabdyqtalǵan.
Rýslan Qasybaev qala jurtshylyǵyn tabıǵatqa shyqqanda órt qaýipsizdigin saqtaýǵa shaqyrdy.
«Órt qaýipsizdigin buzǵan nemese oryndamaǵany úshin eskertý nemese ákimshilik aıyppul túrinde jeke tulǵalarǵa - 3 AEK, laýazymdy tulǵalarǵa – 20 AEK, shaǵyn jáne orta bıznes sýbektilerine 70 AEK mólsherinde ákimshilik jaýapkershilik qarastyrylǵanyn esterińizge salamyz»,- dedi spıker.
