Almatyda orman sharýashylyǵyna arnalǵan halyqaralyq ǵylymı-tájirıbelik konferentsııa ótti
LMATY. Naýryzdyń 26-sy. QazAqparat /Erbol Azanbek/ - Búgin Almatyda orman sharýashylyǵynyń jaı-kúıine arnalǵan «Naryqtyq qatnas jaǵdaıynda orman sharýashylyǵyn jáne aýyl sharýashylyǵynyń erekshe qorǵalatyn aýmaqtaryn ınnovtsııalyq damytý» atty halyqaralyq ǵylymı-tájirıbelik konferentsııa ótti,
dep habarlaıdy QazAqparat.
Konferentsııa Ulttyq agrarlyq ýnıversıtettiń 80 jyldyǵy men QR UǴA akademıgi, belgili ǵalym Sábıt Baızaqovtyń 80 jyldyǵyna arnaldy.
«Sábıt Baızaqov elimizdiń orman sharýashylyǵynyń qalyptasýyna, mamandardy daıyndaýda úlken eńbek sińirdi. 140-tan astam ǵylymı eńbek, birneshe monografııa shyǵardy. 3 ǵylym doktory, 8 ǵylym kandıdatyn daıyndady. S.Baızaqov elimizdiń orman saıasatyn jasaǵan avtorlardyń biri», deıdi Agrarlyq ýnıversıtettiń orman taný jáne orman sharýashylyǵy kafedrasynyń meńgerýshisi, dotsent Jaılaý Toqtasynov.
Onyń aıtýynsha, S.Baızaqov búginde Ortalyq Azııadaǵy orman ekonomıkasy ǵylymynyń tuńǵysh, ári jalǵyz doktory. Onyń eńbekteri orman resýrstaryn taný, orman taksatsııasy, orman ornalastyrý, orman sharýashylyǵyn basqarý jáne orman ekonomıkasyna arnalǵan.1991 jyldan beri QR Aýyl sharýashylyǵy akademııasynyń múshe-korrespondenti, Prezıdıýmynyń bas ǵylymı hatshysy.
Búgingi konferentsııaǵa Polsha, Mońǵolııa, Ózbekstan, Qyrǵyzstannan aýyl sharýashylyǵy salasynyń ǵalymdary, mamandary qatysyp, orman sharýashylyǵy salasynyń jaı-kúıi týraly óz oılaryn ortaǵa saldy. Sondaı-aq S.Baızaqovtyń «Qazaqstannyń orman sharýashylyǵynyń ǵylymı-ınnovatsııalyq basymdylyqtary» atty jańa kitabynyń tusaýkeseri ótti.
