Almatyda «organ qyzmetkeri» kásipkerden 390 myń AQSh dollaryn talap etken

ASTANA. QazAqparat - Sybaılas jemqorlyqqa qarsy qyzmet kásipkerdi para berýge ıtermelegen Almaty qalasynyń turǵynyn ustady, dep habarlaıdy QazAqparat.

Ol ózin quqyq qorǵaý organynyń qyzmetkeri retinde tanystyra otyryp, kásipkerlik sýbektisine qatysty tekserý sharalary júrgizilip jatqandyǵy týraly jalǵan aqparat bergen. Kúdikti óziniń deldaldyq qyzmetterin usynyp, máseleni sheshý úshin 390 myń AQSh dollaryn talap etken.

Kásipker alaıaqtyq áreketterge boı aldyrmaı, Sybaılas jemqorlyqqa qarsy qyzmetke júgingennen keıin, kúdikti aqshany alý kezinde ustaldy.
Sondaı-aq, atalǵan azamattyń turǵylyqty jerin tintý kezinde qosymsha 470 myń AQSh dollary tabyldy.
Olardyń qaıdan alynǵany jáne ustalǵan adamnyń basqa qylmystarǵa qatystylyǵy tekserilýde.
Sot kúdiktige qatysty «qamaýda ustaý» bultartpaý sharasyn taǵaıyndady. Tergeý jalǵasýda.
Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Konstıtýtsııanyń 77-babyna jáne Qylmystyq-protsestik kodeksiniń 19-babyna sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.