Almatyda opyrylyp túsken 9-qabatty úıdiń qasbeti qalpyna keltiriledi - ákimdik

ALMATY. QazAqparat - Almatyda qatty jeldiń saldarynan qasbeti jartylaı qulaǵan úıdiń turǵyndary úıdiń qasbetin qaıta jańǵyrtý úshin ótinim berdi. Bul týraly Almaty qalasy Áýezov aýdanynyń ákimdigi málim etti, dep habarlaıdy QazAqparat tilshisi.

Ákimdiktiń málimetinshe, búgin saǵat 13:30 shamasynda qatty jeldiń saldarynan Áýezov aýdanyndaǵy 1 shaǵynaýdanyndaǵy úıdiń qasbeti jartylaı qulaǵan.

«Bul úıdi 2015 jyly «Nest Stroy» JShS paıdalanýǵa bergen bolatyn. 5 jylǵa sozylǵan kepildik merzimi aıaqtalǵan. Turǵyndar «Turǵyn úı» JShS arqyly úıdiń qasbetin jańǵyrtýǵa ótinim berdi. 15 mamyrdan bastap jobalaý-smetalyq qujattamany jasaý jumystary bastalady. Qazirgi ýaqytta Áýezov aýdanynyń kommýnaldyq qyzmetteri aýmaqty jınaý jumystaryn júrgizip jatyr», - dep habarlady Áýezov aýdany ákimdiginiń baspasóz qyzmeti.

Sondaı-aq qurylys salýshy «Nest Stroy» JShS kompanııasy qalpyna keltirý jumystaryn júrgizý úshin qarjylyq kómek kórsetedi degen ýaǵdalastyqqa qol jetkizildi. Jumystardy úshinshi tarap kompanııasy júrgizedi jáne qysqa merzimde jumysqa kirisedi.

«Aıta keteıik, páterlerdiń, turǵyn emes úı-jaılardyń ıeleri kondomınıým nysanynyń ortaq múlkine aǵymdaǵy jáne kúrdeli jóndeý júrgizýdi qosqanda, kondomınıým nysanynyń ortaq múlkin kútip-ustaý jáne onyń qaýipsiz paıdalanylýyn qamtamasyz etý jóninde sharalar qabyldaýǵa mindetti», - dep eskertti ákimdikte.

Eske salsaq, búgin Almatyda qatty soqqan jeldiń saldarynan «Saryarqa» turǵyn úı keshenindegi 9-qabatty úıdiń shetki qaptamasy opyrylyp túsken bolatyn.