Almatyda opera men balet ónerindegi jańa esimder anyqtaldy
ALMATY. Naýryzdyń 30-y. QazAqparat /Erlik Erjanuly/ - Almatyda Qazaqtyń Abaı atyndaǵy memlekettik akademııalyq opera jáne balet teatrynda "Jańa esimder" dep atalatyn shyǵarmashyl jastar kontserti ótti,
dep habarlaıdy QazAqparat.
Qazkommertsbank qarjylaı qoldaýymen dástúrli túrde jyl saıyn ótip kele jatqan bul shara byltyr Astanada ótken bolatyn. Bıyl ol Almatyda QR halyq ártisi Bazarǵalı Jamanbaevtyń kórkemdik jetekshiligimen jáne QR eńbek sińirgen qıaratkeri Láılim Imanǵazınanyń rejısserligimen Almatyda jalǵasyp otyr.
Kontsertte M.Tólebaevtyń «Birjan-Sara», P. Chaıkovskııdiń "Uıqydaǵy arý", "Evgenıı Onegın", «Dıvertısment», F.Shopenniń «Shopenıana», Dj. Verdıdiń "Rıgoletto", «Taǵdyr kúshi», «Trýbadýr», «Bal-maskarad», «Travıata», A. Adannyń «Korsar», «Jızel» K. Sen-Sanstyń «Samson jáne Dalıla», N. Rımskıı-Korsakovtyń "Patsha qalyńdyǵy", S.Muhamedjanovtyń "Jumbaq qyz», L. Mınkýstiń «Baıaderka», G.Donıtsettıdiń "Nemorıno", "Mahabbat sýsyny" týyndylary oryndaldy.
«Almatyda ótken kontsert jas ártisterdiń shynymen de bizdiń opera jáne balet ónermizdegi «jańa esimder» ekenin dáleldedi. Olar kómeıinen bal tamǵan Bıbigúl Tólegenova, Ermek Serkebaev, sondaı-aq balet juldyzdary - Sara Kósherbaeva, Ramazan Bapov syndy óner maıtalmandarynyń talantty izbasarlary ekenin dáleldedi», deıdi Qazkommertsbanktiń basqarýshy dırektory Maǵjan Áýezov.
