Almatyda onlaın-HQO keńesshileriniń sany artty

ALMATY. QazAqparat – Koronavırýs ınfektsııasynyń taralýyn boldyrmaý úshin Qazaqstanda halyqqa qyzmet kórsetý ortalyqtarynyń jumysy toqtatyldy. Azamattar memlekettik qyzmetterdi tek elektrondy formatta ǵana ala alady. Osyǵan oraı «Azamattarǵa arnalǵan úkimettiń» Almaty fılıaly onlaın-keńesshilerdiń sanyn kóbeıtti, dep habarlaıdy QazAqparat tilshisi.

Elimizde engizilgen tótenshe jaǵdaı rejımine baılanysty azamattar memlekettik qyzmetterdi úıde otyryp alý úshin «elektrondy tsıfrlyq qoltańba» (ETsQ) alýǵa nemese mobıldi azamattar bazasyna tirkelýge ótinish berýde. Al olardyń sáıkestendirý rásimin rastaý úshin onlaın-Halyqqa qyzmet kórsetý ortalyǵy (HQO) jumys isteıdi.

«Onlaın-HQO-da 40 operator eki aýysymda qyzmet kórsetedi. Eger azamattyń telefon nómiri mobıldi azamattar bazasynda tirkelmegen jaǵdaıda, júıe ony HQO operatorymen qosady. Ol birqatar qosymsha suraqtar (qujattardyń derekteri, tirkeý orny jáne t.b.) qoıa otyryp azamatty beınebaılanys arqyly sáıkestendiredi», - deıdi «Azamattarǵa arnalǵan úkimet» memlekettik koroporatsııasy» kommertsııalyq emes AQ Almaty qalasy fılıalynyń dırektory Danııar Qyryqbaev.

Sonymen qatar, Almaty qalasy boıynsha qyzmet alýshylardyń suraqtaryna jedel jaýap berý úshin arnaıy Call-ortalyq jumys isteıdi. Oǵan 110 qyzmetker jumyldyryldy. Call-ortalyq qyzmetiniń sapasyn qamtamasyz etý jáne júktemeni azaıtý maqsatynda 60 keńes berýshi eki aýysymmen isteıdi.

«Taǵy 50 qyzmetker úıde otyryp, turǵyndarǵa keńes berip, olardyń máselelerin jedel sheshýge kómektesýde. Call-ortalyq ashylǵan sátten bastap qyzmetkerler 25 myńnan astam keńes bergen. Kúnine 6-7 myń adam ártúrli suraqtarmen júginedi», - deıdi Danııar Qyryqbaev.

Onyń aıtýynsha, negizinen turǵyndar týý týraly kýálik alý, bala týýyna baılanysty járdemaqylar, avtokólikke qatysty qujattardy úıge jetkizý qyzmeti, onlaın ETsQ, jeke kýálik alý, turǵylyqty jeri boıynsha ýaqytsha jáne turaqty tirkeý, emhanaǵa bekitý, avtokólik quraldaryn esepten shyǵarý jáne qoıý, avtokólikke tyıym salýdy tekserý, júrgizýshi kýáligin qalaı alý jáne aýystyrýǵa baılanysty suraqtardy jıi qoıady.

«Aıta ketý kerek, 608 memlekettik qyzmetti elektrondyq úkimet portaly arqyly alýǵa bolady, onyń ishinde mamandandyrylǵan bólimderdiń qyzmetteri de bar.Smartfon arqyly 60 qyzmet túrin alýǵa múmkindik bar.

Osylaısha, «Azamattarǵa arnalǵan úkimet» halyqtyń elektrondyq úkimet portalyn belsendi paıdalanyp, syrtqa shyqpaı-aq, bar jumysyn úıde bitirip, memlekettik qyzmetterdi onlaın alýyna jaǵdaılar jasaýda.Qyzmetterdi onlaın ala otyryp árkim ózin jáne jaqyndaryn qorǵap, ortaq qaýipsizdikke óz úlesin qosady. Elimizde indet órship turǵanda, jaǵdaıǵa sanaly kózqaras, uqyptylyq jáne úıden shyqpaý - koronavırýsqa qarsy kúreste bizdiń jeńisimizdiń kepili bolmaq»,– dep qortyndylady ol.